Foto: Ashyq derekkóz
Jańa oqý jylynan bastap memlekettik jáne jekemenshik mektepterde tárbie jumysy "Adal azamat" atty birtutas baǵdarlama negizinde júrgiziledi, dep habarlandy Oqý-aǵartý ministrliginiń resmi saitynda.
Baǵdarlamanyń maqsaty – adal, eńbekqor, eljandy azamattar tárbieleý. Al tárbie júiesi jalpyulttyq qundylyqtarǵa negizdelip, mektep, ata-ana jáne qoǵam arasyndaǵy bailanysty nyǵaitýǵa baǵyttalady.
"Ai saiyn belgilengen taqyryptar sabaq pen synyptan tys is-sharalardy bir-birimen sabaqtastyrady. Mysaly: ádildik, eńbekqorlyq, patriotizm syndy qundylyqtar oqý protsesiniń ózegine ainalmaq. Osy baǵytta mektep ómirine "Ónegeli 15 minýt", kúi áýenimen qońyraý soǵý, ulttyq oiyndar sekildi jańa formattar engiziledi. Sonymen qatar oqýshynyń mektep qabyrǵasynan tys ómirlik tájiribesin baiytýǵa da erekshe kóńil bólinedi", - deidi ministrlik mamandary.
Barlyq mektep úshin biryńǵai vizýaldy standart – brendbýk ázirlenedi. Mekteptiń ishki jáne syrtqy kelbeti ulttyq tárbielik qundylyqtar men mádenietti beineleitin ortaǵa ainalady.
"Bul – buryn júzege asyrylǵan "Birtutas tárbie" tujyrymdamasynyń jalǵasy, biraq mazmuny jańartylyp, memleket basshysynyń "Adal azamat – adal eńbek – adal tabys" ideologiialyq qaǵidasymen úndestirilgen", - delingen resmi habarlamada.
Aita keteri, buǵan deiin "Birtutas tárbie" baǵdarlamasy aiasynda "Qamqor" (ekologiia jáne volonterlik), "Eńbegi adal – jas óren" (eńbekke baýlý jáne mamandyqqa baǵdar), "Smart Bala" (IT jáne innovatsiialyq oilaýdy qoldaý), "Shabyt" (óner men mádeniet arqyly rýhani damý), "Ushqyr oi alańy" (pikirsaiys pen ziiatkerlik oiyndar), "Balalar kitaphanasy" (oqý saýattylyǵy men kitap mádenietin damytý) degen alty iri joba júzege asqan bolatyn. Sonymen birge býllingtiń, quqyqbuzýshylyq pen balalar arasyndaǵy qaýiptiń aldyn alýǵa baǵyttalǵan jobalar jalǵasa beredi.
