2020 jyldyń 1 qazanynan bastap azamattarymyzdyń konstitýtsiialyq quqyǵyna qatysty ister boiynsha basty protsesýaldyq sheshimder shyǵarý elektrondy formatqa kóshiriledi.
Bul týraly QR Bas prokýrorynyń orynbasary Marat Ahmetjanov aitty, dep habarlaidy QazAqparat.
«1 qazannan bastap sotqa deiingi tergeýmen ainalysatyn barlyq quqyq qorǵaý organdary azamattarymyzdyń konstitýtsiialyq quqyǵyn qozǵaityn ister boiynsha basty protsessýaldyq sheshim shyǵarýdy elektrondy formatqa kóshiredi. Keshe elimizdiń bas prokýrory Pavlodar oblysyna jumys saparymen baryp, jańashyldyq is júzinde qalai áreket etetindigimen, onyń múmkindigimen tanysty», - dedi ol Ortalyq kommýnikatsiialar qyzmetindegi baspasóz máslihatynda.
Onyń aitýynsha, 1 qazannan bastap kez kelgen protsessýaldyq sheshim shyǵarylǵannan keiin birden sotqa deiingi tergeýdiń biryńǵai tizimine engiziletin bolady. Al ol qadaǵalaýshy prokýror men protsessýaldyq protsestiń ózge de qatysýshylaryna kórinip turady. Óz kezeginde prokýror sheshimniń zańdylyǵyn der ýaqytynda qadaǵalai alady. Zań buzýshylyq oryn alǵan jaǵdaida ol elektrondy formatty joiady.
«Prezident atap ótkendei, qadaǵalaýdyń kesheýildeý jaǵdaiy bar. Qaǵaz nusqada ony burmalaýǵa, ózgertýge bolady. Al muny boldyrmaý tásiliniń biri – tsifrlandyrý. Bul prokýrorlarǵa qosymsha ókilettik emes, qylmystyq isterde azamattardyń quqyǵy úshin qosymsha jaýapkershilik júkteidi. Sondyqtan da biz munyń qalai jumys isteitindigin Pavlodar oblysynda baiqap kórdik, beiimdedik jáne 1 qazannan bastap búkil elimizge bul júieni engizýge bolady degen paiymǵa keldik», - dedi Marat Ahmetjanov.
