Úkimettiń baspasóz ortalyǵynda ótken baspasóz konferentsiiasynda tsifrlyq damý, innovatsiialar jáne aeroǵarysh ónerkásibi vitse-ministri Abylaihan Ospanov mekenjai anyqtamasyn alyp tastaýǵa qatysty túsinik berdi, dep habarlaidy "Ult aqparat".
A. Ospanov atap ótkendei, Qazaqstanda 1 qarashadan bastap mekenjai anyqtamasy talap etilmeidi jáne memlekettik kórsetiletin qyzmetter tiziliminen alynyp tastalatyn bolady. Iaǵni, esh memlekettik organ, mektep ne meditsinalyq mekeme azamattardan mekenjai anyqtamasyn 1 qarashadan bastap surata almaidy. Ony «Azamattarǵa arnalǵan úkimettiń» filialdarynan da, elektrondy úkimet portalynan da alý múmkindigi bolmaidy.
«Qajet bolǵan jaǵdaida qazaqstandyqtar tirkeýge turǵan mekenjailaryn egov.kz elektrondy úkimet portaly men eGov mobile qosymshasyndaǵy jeke kabineti arqyly teksere alady», — dedi A. Ospanov.
Memlekettik organdarǵa keletin bolsaq, olar bul málimetti ishki ister ministrliginiń derekter bazasymen integratsiialanǵan aqparattyq júieleri arqyly alatyn bolady.
Sonymen qatar A. Ospanov jumys berýshilerdiń mekenjai anyqtamasyn suraýǵa quqylary joq ekenin aitty. Birinshi kezekte, eńbek kodeksinde turǵylyqty mekenjaiyn rastaityn qujatty usyný qajettigi týraly talap joq.
«Eger biz búgin memlekettik deńgeide mekenjai anyqtamasy uǵymyn alyp tastaityn bolsaq, onda azamattan bul qujatty eńbekke ornalasý kezinde talap etýge eshkimniń quqyǵy joq. Sondyqtan biz barlyq jumys berýshiler jumysqa eńbekke ornalasýǵa qatysty ózderiniń talaptaryn sáikestendirýi kerek dep otyrmyz», — dedi vitse-ministr.
Jumys berýshilerden basqa, mekenjai anyqtamasyn elimizdegi barlyq mekemeler endi suramaýy tiis.
«Biz búgin elimizde turǵylyqty orny men mekenjaiy týraly uǵymdy túbegeili ózgertip otyrmyz. Buryn biz ár adym saiyn, barlyq jerde - eńbekke ornalasqanda, jumysqa qabyldaǵanda, meditsinalyq uiymda, balabaqshalarda, PIK qyzmetterine kelisimsharttar jasasý úshin t.b. ony rastaýymyz kerek bolatyn. Barlyq jerde biz bul anyqtamany baryp alyp, ony suraǵan mekemege usynýymyz kerek bolatyn. Bizde osy málimetterdiń qajettiginen bas tartýǵa negiz bolǵan joq. Al búgin barlyq turǵyndarǵa osyndai múmkindikti usynyp otyrmyz. Qazir Qazaqstan azamaty óziniń qandai da bir mekenjai boiynsha turyp jatqanyn eshkimge dáleldeýge mindetti emes», — dedi A. Ospanov.
Meditsinalyq jáne bilim berý mekemelerine kelsek, bul uiymdarda integratsiialanǵan aqparattyq júieler bar. Mysaly, barlyq meditsinalyq mekemelerde búginde Biryńǵai densaýlyq saqtaý aqparattyń júiesimen kiriktirilgen aqparattyq júieler jumys isteidi. Dárigerdiń qabyldaýynda bolý úshin eń aldymen turǵylyqty jeri boiynsha tirkelýi kerek. Eger buryn osy kezeńde mekenjai anyqtamasynyń bolýy mindetti bolsa, qazir ol talap etilmeidi.
«Bilim berý mekemelerinde de solai. Meditsinalyq jáne bilim berý mekemelerimen jumystardy biz ótken jyly bastadyq. Ótken jyldyń jazynda ata-analardan mekenjai anyqtamasyn usynýdy talap etýge tyiym salynǵan edi. Ákimdikter deńgeiinde túsindirý jumystary júrgizildi», — dedi vitse-ministr.
Sonymen qatar ol búgingi tańda elektrondy formatta 28 anyqtama beriletinin aitty. Jyl saiyn túrli uiymdarǵa usyný úshin 20 mln-nan asa anyqtama basyp shyǵarylady eken. Kelesi jyldan bastap mekenjai anyqtamasy tárizdi, basqa da anyqtamalardy birtindep alyp tastaý kózdelip otyr. Ol úshin aqparattyq júielerdi kiriktirý jumystaryn aiaqtaý qajet.
