2019 jyldyń 1 qańtarynan bastap abonenttik qurylǵylardy mindetti tirkeý erejesi kúshine enedi. Bul týraly QR Ishki ister ministrliginiń resmi ókili Almas Sadýbaev aitty, dep habarlaidy QazAqparat tilshisi.
«2019 jyldyń 1 qańtarynan bastap IMEI-kod + SIM-karta + tulǵa JSN-ni syzbasy boiynsha abonenttik qurylǵylardy mindetti tirkeý erejesi kúshine enedi. Tirkelmegen abonentterge bailanys qyzmeti kórsetilmeidi. Osyǵan bailanysty azamattar aǵymdaǵy jyldyń sońyna deiin ózderiniń bailanys qurylǵylaryn tirkeýleri qajet», - dedi Almas Sadýbaev.
Osy rette IIM resmi ókili uialy bailanys operatorlarynyń filialdarynda úlken kezek bolyp, qoǵamda dúrbeleń týmaýy úshin azamattarǵa qurylǵylaryn der ýaqytynda tirkeýge keńes beredi.
«Bul eń aldymen azamattardyń múddesin qorǵaý úshin jasalyp otyr. Eger bir adamnyń telefony tirkegennen keiin urlanatyn bolsa, onda baza arqyly ony kim paidalanatyndyǵyn anyqtaýǵa bolady. Buǵan qosa, bailanys operatorlary da bazada qurylǵynyń IMEI-kody urlanǵan retinde kórsetilip tursa bailanysqa tosqaýyl qoiý múmkindigin alady», - dedi ol.
