Eńbek jáne halyqty áleýmettik qorǵaý ministri Birjan Nurymbetov kópbalaly emes otbasylarǵa járdemaqy tólene me, joq pa degen suraqqa jaýap berdi, – dep habarlaidy Sputnik Qazaqstan.
"Biz kópbalaly otbasylarǵa jańa járdemaqy engizdik. Qazir ony 370 myń otbasy alyp jatyr. Endi tórt baladan az, bir, eki, úsh balasy barlar da bizge de sondai járdemaqy berilse degen ótinishterin bildirip jatyr. Qazir ministrliktiń ishinde ártúrli tásilderin qarap, qarjyny eseptep jatyrmyz. Biraq, bul másele, qarjy múmkindigine bailanysty", - dedi Nurymbetov májiliste ótken kezdesýde.
Aitýynsha, jańa járdemaqyny alatyn 370 myń otbasynyń 125 myńy turmysy tómen januialar. Al bir, eki, úsh balaly turmysy tómen otbasylardyń sany 190 myń. Qazaqstan boiynsha 1-3 balasy barlar sany 2 million 904 januia . Iaǵni, on bes ese kóp, dep jalǵastyrdy ministr.
"Sondyqtan ol on bes ese artyq qarajatty talap etedi. Ekinshiden, dáýletti, jaǵdaiy jaqsy otbasylarǵa osy járdemaqyny tóleý kerek pe, joq pa, ol da úlken suraq. Sondyqtan biz áli eshqandai sheshimge kelgen joqpyz. Biraq, onyń bárin qarap jatyrmyz", dep sendirdi ol.
Biyldan bastap ataýly áleýmettik kómekten bólek, kópbalaly otbasylarǵa jańa járdemaqy tólene bastady. Onyń basty ereksheligi - járdemaqy tabysyna qaramastan tólenedi. Ol bala sanyna qarai ai saiyn beriledi.
Jańa járdemaqynyń mólsheri:
4 balaǵa - 42 496 teńge;
5 balaǵa – 53 127 teńge;
6 balaǵa – 63 757 teńge;
7 jáne odan kóp balaǵa – 74 388 teńge.
