Qańtar oqiǵasy kezinde urlanǵan 1 215 qarý jáne 22 myń oq-dári qaitaryldy. Bul týraly Májiliste QR Ishki ister ministri Marat Ahmetjanov aitty, dep habarlaidy QazAqparat.
Onyń atap ótýinshe, tergeý qylmystyq protsestiń úsh býyndy modeline sáikes júrgizilip jatyr. Iaǵni, tergeýshilerdiń barlyq negizgi sheshimderi prokýrordyń súzgisinen ótedi. Osylaisha, úsh satylyq baqylaý arqyly protsestiń ádilettigi qamtamasyz etilýde. Kúdiktilerdiń konstitýtsiialyq quqyqtary tolyǵymen saqtalýda.
«Qyzmetkerlerdiń ókilettigin asyra paidalaný faktilerine qatysty shaǵymdar boiynsha sotqa deiingi tergeý bastaldy. Obektivti bolý úshin bul ister prokýratýra jáne jemqorlyqqa qarsy qyzmetke berildi. Tergeý amaldary mindetti túrde beinekameraǵa jazylýda. Oǵan kúdiktilerdiń qorǵaýshylar da qatysýda», - dedi ol.
Sonymen qatar ministr qazirgi tańda zańsyz ainalymda áli de kóptegen qarý-jaraq bar ekendigin aitady.
«Ony qaitarý boiynsha barlyq sharalar qabyldanyp jatyr. Respýblika boiynsha arnaiy «Qarý» operatsiiasy jalǵasýda. Onyń barysynda 1 215 qarý jáne 22 myń oq-dári qaitaryldy. Sonymen qatar, azamattar erikti túrde 120 qarý tapsyrdy», - dedi Marat Ahmetjanov.
