حالىقارالىق بوكس فەدەراتسيياسى (IBF) بارلىق سالماق دەرەجەسٸنٸڭ جاڭارتىلعان رەيتينگٸن جارييالادى, دەپ حابارلايدى Sports.kz پورتالى.
نازارلارىڭىزعا قازاقستان بوكسشىلارىنىڭ قاي ورىندا ەكەنٸن ۇسىنامىز:
ەكٸنشٸ ورتا ساناتتاعى ايدوس ەربوسىنۇلى جەتٸنشٸدەن التىنشى ورىنعا كٶتەرٸلدٸ. بۇل سالماقتا IBF تۇجىرىمى بويىنشا ەلەم چەمپيونى – امەريكالىق كالەب پلانت. العاشقى ەكٸ قاتار ۆاكانتتى, ال ٷشٸنشٸ ورىندا تاعى بٸر اقش ٶكٸلٸ كالەب ترۋا تۇر.
ەلەم چەمپيونى اتاعى گەنناديي گولوۆكينگە تيەسٸلٸ ورتا سالماقتا مەيٸرٸم نۇرسۇلتانوۆ ونىنشى ورىننان توعىزعا كٶتەرٸلدٸ, جەنٸبەك ەلٸمحانۇلى 11-قاتاردا بولسا, قانات يسلام 14-ورىندى ساقتاپ قالدى. رەيتينگتٸڭ العاشقى ەكٸ ورنى ۆاكانتتى, ال ٷشٸنشٸ ورىن, ياعني جوعارى ٷمٸتكەرلٸك پوزيتسييادا نەمٸس پاتريك ۆويتسيتسكي تۇر.
جارتىلاي ورتا ديۆيزيوندا دانييار ەلەۋسٸنوۆ بۇرىنعىشا توعىزىنشى قاتاردا. كٸشٸ ەرولل سپەنس ەلەم چەمپيونى بولىپ قالدى, ال بٸرٸنشٸ ورىندا ٶزبەكستان ٶكٸلٸ كۋدراتيللو ابدۋكاحوروۆ تۇر, ودان كەيٸنگٸ ورىندارعا امەريكالىق شون پورتەر مەن رەسەيلٸك سەرگەي ليپينەتس جايعاسقان.
بٸرٸنشٸ جارتىلاي ورتا سالماقتا ٶنەر كٶرسەتەتٸن باتىر جٷكەمباەۆ بٸر ساتىعا تٶمەندەپ, سەگٸزٸنشٸ ورىنعا سىرعىدى. ەلەم چەمپيونى اتاعى بريتاندىق دجوش تەيلورعا تيەسٸلٸ, العاشقى ەكٸ ورىن بوس, ال ٷشٸنشٸ ورىندا -اۋسترالييالىق بوكسشى ليام پارو.
