فوتو: اشىق دەرەككٶز
قارجىلىق مونيتورينگ اگەنتتٸگٸ پروكۋراتۋرانىڭ ٷيلەستٸرۋٸمەن اتىراۋ وبلىسىندا اۋقىمدى جەدەل-تەرگەۋ ٸس-شارالارىن جٷرگٸزٸپ, بٸرىڭعاي جيناقتاۋشى زەينەتاقى قورىنان قاراجاتتى زاڭسىز شەشۋگە قاتىسى بار 5 قىلمىستىق توپتىڭ ەرەكەتٸن انىقتادى, دەپ حابارلايدى Ult.kz.
تەرگەۋ مەلٸمەتٸنشە, ۇيىمداستىرۋشىلار جالعان قۇجاتتار رەسٸمدەۋ ارقىلى قازاقستاننىڭ بٸرنەشە ٶڭٸرٸندە – اتىراۋ, استانا, الماتى, شىمكەنت, اقتاۋ جەنە ٶزگە قالالاردا جوق ستوماتولوگييالىق كلينيكالاردى تٸركەگەن. بۇل «قاعاز جٷزٸندەگٸ» مەديتسينالىق ۇيىمداردىڭ عيماراتتارى دا, جابدىقتارى دا, بٸلٸكتٸ ماماندارى دا بولماعان. تٸپتٸ ولاردىڭ باسشىلارىنىڭ مەديتسينالىق بٸلٸمٸ جوق بولىپ شىقتى.
جالعان قۇجات جاساۋ ارقىلى ازاماتتارعا زەينەتاقى قورىنان اقشا شەشۋگە «جەردەمدەسكەنٸ» ٷشٸن قىلمىستىق توپ ٶكٸلدەرٸ قاراجاتتىڭ 10%-20%-ىن سىياقى رەتٸندە ۇستاپ وتىرعان. ال قولما-قول اقشاعا اينالدىرۋ ٷشٸن 226 دروپپەردٸ پايدالانعان. نەتيجەسٸندە اينالىمنان 200 ملرد تەڭگەدەن استام قارجى شىعارىلعان.
تەرگەۋ بارىسىندا كٷدٸكتٸلەردٸڭ زەينەتاقى اقشاسىنا ساتىپ العان 15 قىمبات اۆتوكٶلٸك (Mercedes-Benz G-class, BMW X7, Porsche Taycan, Cadillac Escalade جەنە باسقا دا ماركالار) تەركٸلەندٸ. بۇعان قوسا زەرگەرلٸك بۇيىمدار, پەتەرلەر, كوممەرتسييالىق نىساندار مەن جەر تەلٸمدەرٸ انىقتالدى. تەركٸلەنگەن مٷلٸكتٸڭ جالپى قۇنى 600 ملن تەڭگەدەن اسادى.
قازٸرگٸ ۋاقىتتا 59 تٸنتۋ جٷرگٸزٸلدٸ, 10 ادامعا قاتىستى بۇلتارتپاۋ شاراسى قولدانىلدى. قىلمىستىق جولمەن تابىلعان ٶزگە دە مٷلٸكتٸ ٸزدەستٸرۋ جۇمىستارى جالعاسىپ جاتىر.
اگەنتتٸك تاراتقان رەسمي اقپاراتتا, تەك زاڭسىز سحەمانى ۇيىمداستىرۋشىلار قىلمىستىق جاۋاپكەرشٸلٸككە تارتىلاتىنى, ال ٶز زەينەتاقى قاراجاتىن العان ازاماتتارعا ايىپ تاعىلمايتىنى اتاپ ٶتٸلدٸ.
