پرەزيدەنت ەكٸمشٸلٸگٸنٸڭ جەتەكشٸسٸ ەدٸلبەك جاقسىبەكوۆ مەملەكەتتٸك ورگانداردا كادرلاردىڭ قىزمەتتە تۇراقتاماۋ مەسەلەسٸ بارىن ايتىپ, مينيسترلٸكتەردەگٸ شتات سانىن قىسقارتۋدى ۇسىندى. Tengrinews.kz سايتىنىڭ حابارلاۋىنشا, جاقسىبەكوۆ بۇل تۋرالى مەملەكەتتٸك قىزمەت ٸستەرٸ جەنە كوررۋپتسيياعا قارسى كٷرەس اگەنتتٸگٸنٸڭ جيىنىندا ايتتى.
"كٶپتەگەن قىزمەت ورىندارى ۇزاق ۋاقىت بويى بوس تۇرا بەرەدٸ. ٷشٸنشٸ توقساننىڭ قورىتىندىسى بويىنشا, قارجى مينيسترلٸگٸندە 970 قىزمەت بوس تۇر. ۇلتتىق ەكونوميكا مينيسترلٸگٸندە 900-دەن استام, اۋىلشارۋاشىلىعى مينيسترلٸگٸندە 280-نەن استام جۇمىس ورنى بوس تۇر" دەگەن ەدٸلبەك جاقسىبەكوۆ.
ونىڭ سٶزٸنە قاراعاندا, جۇمىس ورنىنىڭ ۇزاق ۋاقىت بوس تۇرۋى مەملەكەتتٸك قىزمەت اپپاراتىنىڭ تۇراقتىلىعىنا كەرٸ ەسەر ەتٸپ, باسقا قىزمەتكەرلەرگە ارتىق جٷكتەمە بولادى جەنە جۇمىس ساپاسىنا تەرٸس ىقپالىن تيگٸزەدٸ.
جاقسىبەكوۆتٸڭ پٸكٸرٸنشە, بوس جۇمىس ورىندارىنىڭ نەگە وسىنشالىقتى كٶپ ەكەنٸن تالداپ, تٸپتٸ مينيسترلٸكتەردە شتات سانىن قىسقارتۋ مەسەلەسٸن كٶتەرۋ كەرەك. ول مەملەكەتتٸك قىزمەتكەرلەردٸڭ ا كورپۋسىندا رەزەرۆتە 150-گە تارتا ادام بولا تۇرا 16 لاۋازىمدى قىزمەتتٸڭ ۇزاق ۋاقىت بويى بوس تۇرعانىن ايتىپ, اگەنتتٸكتٸ مەملەكەتتٸك ورگاندارمەن جٷيەلٸ جۇمىس ٸستەمەيدٸ دەپ سىناعان.
