فوتو: اشىق دەرەككٶزدەن
قازاقستان رەسپۋبليكاسى پارلامەنتٸ مەجٸلٸسنٸڭ دەپۋتاتى, «AMANAT» پارتيياسى فراكتسيياسىنىڭ مٷشەلەرٸ ا.قۇسپان پرەمەر-مينيسترٸدٸڭ ورىنباسارى – مەدەنيەت جەنە اقپارات مينيسترٸ ا.ع.بالاەۆاعا دەپۋتاتتىق ساۋال جولداپ, ەسكەرگە دەيٸنگٸ دايىندىقتىڭ ماڭىزى مەن بولاشاعى جٶنٸندە قۇقىقتىق تٷسٸندٸرۋ جۇمىستارىن جٷرگٸزۋ قاجەت دەپ ەسەپتەيتٸنٸن ايتتى. بۇل تۋرالى Ult.kz حابارلايدى.
سوڭعى جىلدارى مەرزٸمدٸ ەسكەري قىزمەتتٸ جاساقتاۋ مەسەلەسٸ كٷردەلەنٸپ بارا جاتقانىن ايتىپ ٶتكەن دەپۋتات ەسكەري قىزمەتتٸ سانالى تٷردە ٶمٸرٸنٸڭ ٶزەگٸ, نەگٸزٸ ەتٸپ تاڭداعان جاستاردىڭ سانى جىلدان جىلعا ازايىپ بارادى دەپ قىنجىلدى.
ابزال قۇسپاننىڭ پٸكٸرٸنشە بۇل كٶرٸنٸس اتقارىلىپ جاتقان شارالار تيٸمدٸلٸگٸنٸڭ جەتكٸلٸكسٸز جەنە مۇندا فورماليزمنٸڭ كەڭ ورىن العانىن كٶرسەتەدٸ.
"وسى ولقىلىقتاردى جويۋ ماقساتىندا 2025 جىلدىڭ 16 شٸلدەسٸندە ەسكەري-پاتريوتتىق تەربيە مەن ەسكەرگە دەيٸنگٸ دايىندىقتى بٸرتۇتاس ەرٸ جٷيەلٸ مودەلٸن قالىپتاستىرۋعا باعىتتالعان زاڭنامالىق ٶزگەرٸستەر قابىلداندى.
«جاقسى جٷيە – جارتى جەڭٸس» دەگەندەي, زاڭ شەڭبەرٸندە سالالىق زاڭنامالار ٶزارا ٷيلەستٸرٸلٸپ, ازاماتتاردى ەسكەري قىزمەتكە دايارلاۋدىڭ نىساندارى ناقتىلانىپ, كەڭەيتٸلدٸ.
اتالعان ٶزگەرٸستەر تولىق تٷردە شىنايى ٸسكە اسقان جاعدايدا, ورتا بٸلٸم بەرۋ ۇيىمدارىنىڭ بارلىعىن, ونىڭ ٸشٸندە ماماندىرىلعان ەسكەري مەكتەپتەردٸ , وعان قوسا ەسكەري-پاتريوتتىق بٸرلەستٸكتەردٸ قامتىپ, ولاردىڭ دايىندىق شارالارىنا, ەسەپكە الۋ جٷيەسٸنە, قول جەتكٸزگەن تابىستارىن باعالاۋعا جەنە بٸرىڭعاي تالاپتاردى نەتيجەلٸ جٷرگٸزۋگە مٷمكٸندٸك بەرەدٸ.
الايدا, قۇقىقتىق تٷسٸندٸرۋ جۇمىستارىنىڭ ەلسٸزدٸگٸ, سونداي-اق جەكەلەگەن ۋەكٸلەتتٸ ورگاندار تاراپىنان ورىنداۋشىلىق تەرتٸپتٸڭ تٶمەندٸگٸ, اتالعان زاڭ نورمالارىنىڭ بىتىراڭقى بەرەكەتسٸزدٸگٸنە, باياۋ ٸسكە اسۋىنا ەكەلٸپ, ولاردىڭ ٶمٸرلٸك مەنٸ بار نەتيجەسٸنە كەرٸ ەسەرٸن تيگٸزۋدە.
ەسكەرگە دەيٸنگٸ دايىندىقتى دامىتۋ – ۇلتتىق قاۋٸپسٸزدٸكتٸ نىعايتۋدىڭ جەنە بالعىن جاستاردىڭ ازاماتتىق جاۋاپكەرشٸلٸگٸن قالىپتاستىرۋدىڭ ماڭىزدى باعىتتارىنىڭ بٸرٸ ەكەنٸن تەۋەلسٸزدٸك العان جىلدارىمىزدا ەبدەن تانىدىق", – دەيدٸ ول.
وسىعان وراي, دەپۋتاتتىڭ سٶزٸنشە قىسقا مەرزٸمدە ويى مەن بويى, جانى مەن قانى شىڭدالعان, وتان سٷيگٸش جاستاردى دايىندايمىز دەسەك قازٸردەن باستاپ بارلىق مٷددەلٸ مەملەكەتتٸك ورگانداردىڭ بٸرلەسكەن كٷش-جٸگەرٸمەن اۋقىمدى ۇيىمداستىرۋشىلىق, ەدٸستەمەلٸك جەنە باسقارۋشىلىق جۇمىستاردى جٷرگٸزۋ اۋاداي قاجەت.
"«بٸرلٸك بار جەردە – تٸرلٸك بار» قاعيداتىن باسشىلىققا الا وتىرىپ, حالىق اراسىندا بٸلٸم بەرۋ ۇيىمدارى مەن جاستار بٸرلەستٸكتەرٸ اراسىندا ەسكەرگە دەيٸنگٸ دايىندىقتىڭ جاڭا تالاپتارىن, ونىڭ ماڭىزى مەن بولاشاعى جٶنٸندە ماقساتتى ەرٸ جٷيەلٸ قۇقىقتىق-تٷسٸندٸرۋ جۇمىستارىن ساپالى, نەتيجەلٸ تٷردە جٷرگٸزۋ قاجەت", – دەدٸ دەپۋتات ٶز سٶزٸندە.
