Foto: Ashyq derekkózden
Qazaqstan Respýblikasy Parlamenti Májilisniń depýtaty, «AMANAT» partiiasy fraktsiiasynyń músheleri A.Quspan Premer-Ministridiń orynbasary – Mádeniet jáne aqparat ministri A.Ǵ.Balaevaǵa depýtattyq saýal joldap, áskerge deiingi daiyndyqtyń mańyzy men bolashaǵy jóninde quqyqtyq túsindirý jumystaryn júrgizý qajet dep esepteitinin aitty. Bul týraly Ult.kz habarlaidy.
Sońǵy jyldary merzimdi áskeri qyzmetti jasaqtaý máselesi kúrdelenip bara jatqanyn aityp ótken depýtat áskeri qyzmetti sanaly túrde ómiriniń ózegi, negizi etip tańdaǵan jastardyń sany jyldan jylǵa azaiyp barady dep qynjyldy.
Abzal Quspannyń pikirinshe bul kórinis atqarylyp jatqan sharalar tiimdiliginiń jetkiliksiz jáne munda formalizmniń keń oryn alǵanyn kórsetedi.
"Osy olqylyqtardy joiý maqsatynda 2025 jyldyń 16 shildesinde áskeri-patriottyq tárbie men áskerge deiingi daiyndyqty birtutas ári júieli modelin qalyptastyrýǵa baǵyttalǵan zańnamalyq ózgerister qabyldandy.
«Jaqsy júie – jarty jeńis» degendei, zań sheńberinde salalyq zańnamalar ózara úilestirilip, azamattardy áskeri qyzmetke daiarlaýdyń nysandary naqtylanyp, keńeitildi.
Atalǵan ózgerister tolyq túrde shynaiy iske asqan jaǵdaida, orta bilim berý uiymdarynyń barlyǵyn, onyń ishinde mamandyrylǵan áskeri mektepterdi , oǵan qosa áskeri-patriottyq birlestikterdi qamtyp, olardyń daiyndyq sharalaryna, esepke alý júiesine, qol jetkizgen tabystaryn baǵalaýǵa jáne biryńǵai talaptardy nátijeli júrgizýge múmkindik beredi.
Alaida, quqyqtyq túsindirý jumystarynyń álsizdigi, sondai-aq jekelegen ýákiletti organdar tarapynan oryndaýshylyq tártiptiń tómendigi, atalǵan zań normalarynyń bytyrańqy bereketsizdigine, baiaý iske asýyna ákelip, olardyń ómirlik máni bar nátijesine keri áserin tigizýde.
Áskerge deiingi daiyndyqty damytý – ulttyq qaýipsizdikti nyǵaitýdyń jáne balǵyn jastardyń azamattyq jaýapkershiligin qalyptastyrýdyń mańyzdy baǵyttarynyń biri ekenin Táýelsizdik alǵan jyldarymyzda ábden tanydyq", – deidi ol.
Osyǵan orai, depýtattyń sózinshe qysqa merzimde oiy men boiy, jany men qany shyńdalǵan, otan súigish jastardy daiyndaimyz desek qazirden bastap barlyq múddeli memlekettik organdardyń birlesken kúsh-jigerimen aýqymdy uiymdastyrýshylyq, ádistemelik jáne basqarýshylyq jumystardy júrgizý aýadai qajet.
"«Birlik bar jerde – tirlik bar» qaǵidatyn basshylyqqa ala otyryp, halyq arasynda bilim berý uiymdary men jastar birlestikteri arasynda áskerge deiingi daiyndyqtyń jańa talaptaryn, onyń mańyzy men bolashaǵy jóninde maqsatty ári júieli quqyqtyq-túsindirý jumystaryn sapaly, nátijeli túrde júrgizý qajet", – dedi depýtat óz sózinde.
