اقمولا وبلىسىنىڭ قىلمىستىق ٸستەر جٶنٸندەگٸ مامانداندىرىلعان اۋدانارالىق سوتى بۋراباي اۋدانىنىڭ تٶرت تۇرعىنىن ٶلتٸرگەن سوتتالۋشىنى ٶمٸر بويىنا باس بوستاندىعىنان ايىرۋعا ٷكٸم شىعاردى, دەپ حابارلايدى "ۇلت اقپارات" قازاقپارات اگەنتتٸگٸنە سٸلتەمە جاساپ.
سوتتا انىقتالعانداي, سوتتالۋشى ٸشٸمدٸك ٸشكەننەن كەيٸن زارداپ شەككەندەردٸڭ بٸرٸمەن بولعان جانجالدىڭ سالدارىنان ۇيىقتاپ جاتقاندا تٶرت ەيەلدٸ, ياعني دەرمەنسٸز كٷيدە بولعان ادامداردى ٶلتٸرگەن.
سوتتالۋشىنىڭ كٸنەسٸنٸڭ دەلەلٸ ونىڭ كٸسٸ ٶلتٸرگەنٸ تۋرالى ادۆوكاتتىڭ قاتىسۋىمەن بەرٸلگەن العاشقى مويىنداۋى بولدى.
سونىمەن قاتار, تابىلعان قىلمىس قۇرالى پىشاقتان ەر ادامنىڭ جەكە يٸسٸ مەن جەبٸرلەنۋشٸلەردٸڭ قانى تابىلدى.
سوتتا پروكۋرور مەن جەبٸرلەنۋشٸ تاراپ ٶمٸر بويىنا باس بوستاندىعىنان ايىرۋدى سۇرادى.
الايدا سوتتالۋشىنىڭ ٶزٸ ايعاقتارىن ٶزگەرتتٸ, كٸنەسٸن مويىندامادى جەنە جاساعان ٸسٸنە ٶكٸنبەدٸ.
«سوت سوتتالۋشىعا ٶمٸر بويىنا سوتتاۋ كەزٸندە سوتتالۋشىنىڭ بۇرىن بٸرنەشە رەت سوتتالعانىن, بۇرىن تاعايىندالعان جازالار ونى تٷزەتۋ ٷشٸن جەتكٸلٸكسٸز ەكەنٸن جەنە ول ٶزٸنە تيٸستٸ قورىتىندى جاساماي, ۇيىقتاپ جاتقان تٶرت جازىقسىز ەيەلدٸ ٶلتٸرگەنٸن ەسكەردٸ. سونداي-اق, سوت اسا اۋىر قىلمىستىڭ مەن-جايىن, قوعامدىق قاۋٸپتٸڭ سيپاتى مەن دەرەجەسٸن, قازا تاپقانداردىڭ سانىن ەسكەردٸ. سونىمەن بٸرگە قىلمىستىڭ سەبەبٸ جەبٸرلەنۋشٸمەن شامالى قاقتىعىس, جەبٸرلەنۋشٸلەردٸڭ دەرمەنسٸز جاعدايىن پايدالانۋ بولدى. سوت اتالعان مەن-جايدى ەسكەرە وتىرىپ, سوتتالعان ادامدى قوعام ٷشٸن اسا قاۋٸپتٸ دەپ سانادى. سوتتالعان ادامنىڭ كٸنەسٸن جەڭٸلدەتەتٸن جاعداي كەمەلەتكە تولماعان بالانىڭ بولۋى بولدى. سوت سوتتالعان ادامنىڭ جاۋاپكەرشٸلٸگٸن اۋىرلاتاتىن مەن-جاي دەپ قىلمىس جاساۋدى الكوگولدٸك ماساڭ كٷيدە دەپ تانىدى», - دەپ اتاپ ٶتتٸ ۆەدومستۆودان.
سول سەبەپتٸ سوت ەر ادامعا ٶمٸر بويىنا باس بوستاندىعىنان ايىرۋ جازاسىن تاعايىندادى.
ول ونى تٶتەنشە قاۋٸپسٸزدٸك قىلمىستىق-اتقارۋ جٷيەسٸ مەكەمەسٸندە ٶتەيتٸن بولادى.
وسى رەتتە ول العاشقى ٷش جىلىن تولىق قاۋٸپسٸز قىلمىستىق-اتقارۋ جٷيەسٸ مەكەمەسٸندە ٶتكٸزەدٸ. سوت جەبٸرلەنۋشٸنٸڭ مورالدىق زيياندى ٶتەۋ تۋرالى مەلٸمدەلگەن تالاپ-ارىزدارىن تولىق كٶلەمدە قاناعاتتاندىردى.
سوت ٷكٸمٸ زاڭدى كٷشٸنە ەنگەن جوق.
ەسكە سالا كەتەيٸك, ٶتكەن جىلدىڭ 5 جەلتوقسانىندا بۋراباي اۋداندىق پوليتسييا بٶلٸمٸنٸڭ كەزەكشٸ بٶلٸمٸنە بۋراباي كەنتٸنٸڭ تۇرعىنى حابارلاسىپ, كٶپقاباتتى تۇرعىن ٷيدٸڭ پەتەرٸندە تٶرت ەيەلدٸ ٶلتٸرگەنٸن ايتقان بولاتىن.
كەيٸن پوليتسييا قىزمەتكەرلەرٸ بٸرنەشە رەت سوتتالعان 28 جاستاعى جەرگٸلٸكتٸ تۇرعىندى ۇستادى.
