اباي اتامىزدىڭ بۇل سۋرەتٸ مەنٸڭ قولىما 1994 جىلى تٷسٸپ ەدٸ. اۆتورى قىتاي سۋرەتشٸسٸ. سىرتقى ٸستەر مينيسترلٸگٸنٸڭ يۋنەسكو ٸستەرٸ جەنە مەدەني بايلانىس باسقارماسىندا بٶلٸم باسقارىپ جٷرگەنٸمدە, "قازاقستان ديپلوماتيياسى" اتتى ٷش تٸلدە جۋرنال شىعارماق بولدىق. العاشقى سانىنا ۇلى اقىننىڭ 150 جىلدىعىنا وراي ماتەريالدار دايىندادىق. بٸر ماقالانى قىتاي ەلشٸلٸگٸندە مەدەني اتتاشە قىزمەتٸندە جٷرگەن ديپلومات ەرٸ ابايدىڭ "قارا سٶزدەرٸن" قىتاي تٸلٸنە اۋدارعان جازۋشى سۋ چجوۋسۋن (سۋ جوۋشيوڭ) جولداستان الدىم. ول ماقالاسىمەن قوسا وسى سۋرەتتٸ ۇسىندى.
بۇل پورترەتتٸ جۋڭگونىڭ بەلگٸلٸ سۋرەتشٸسٸ گاو مان (گاۋ ماڭ) 1993 جىلى اباي قۇنانباەۆتىڭ قىتاي تٸلٸندەگٸ تاڭدامالى كٸتابىنا ارناپ سالعان بولىپ شىقتى. جۋرنالدىڭ تۇڭعىش نومەرٸ باسۋعا دايىن بولعان كەزدە جوعارعى جاقتا اۋىس-كٷيٸس بولىپ, بٸزدٸڭ باسىلىمىمىزدىڭ شىعۋىنا مٷددەلٸ بولىپ وتىرعان مينيستر ق.توقاەۆ باسقا قىزمەتكە اۋىستى دا, ورنىنا ق.ساۋداباەۆ كەلدٸ. ول كەلە سالا ەندٸ شىعا بەرگەن جۋرنالدى توقتاتىپ, بٸرجولاتا جاۋىپ تاستادى. سونىمەن دايىندالعان جۋرنال نومەرٸ تٷگەلٸمەن كومپيۋتەردە قالىپ, كەيٸن ۇمىتىلدى.
جاقىندا پوليگون زاردابى تۋرالى ەرتەرەكتە جازعان كٶركەم ەڭگٸمەمدٸ ٸزدەپ, ارحيۆٸمدٸ اقتارىپ وتىرىپ, اباي اتامىزدىڭ سول پورترەتٸن تاۋىپ الدىم. قاسىندا قىتاي اۋدارماشىسىنىڭ ورىس تٸلٸندەگٸ ماقالاسى دا بار ەكەن.
ۇلىقبەك ەسدەۋلەتتٸڭ فەيسبۋكتاعى جازباسىنان
