پرەمەر-مينيستر اسقار مامين ەكٸنشٸ دەڭگەيلٸ بانكتەردٸ وتاندىق تاۋار ٶندٸرٸسٸن دامىتۋ جۇمىسىندا قولداۋعا شاقىردى, دەپ حابارلايدى "ۇلت اقپارات".
«قازٸردٸڭ ٶزٸندە جاڭا ٶندٸرٸس وشاقتارىن قۇرۋ بويىنشا 27 وففتەيك كەلٸسٸم ماقۇلداندى. ول بويىنشا ينۆەستيتسييا كٶلەمٸ شامامەن 915 ملرد تەڭگەنٸ قۇرايدى. 2 مىڭ جاڭا جۇمىس ورىنى قۇرىلادى. ٶز كەزەگٸندە ٷكٸمەت ۇلتتىق بانكپەن بٸرلەسە وتىرىپ, مۇنداي كەلٸسٸمدەردٸ بەرٸك كەپٸلدٸك رەتٸندە تانۋ بويىنشا جۇمىس جٷرگٸزٸپ جاتىر. بۇل باعىتتاعى قادام اتالعان جوبالاردى قارجىلاندىرۋدا قولجەتٸمدٸلٸكتٸ جەڭٸلدەتە تٷسەدٸ. وسىعان بايلانىستى قور 3 350 تاۋار پوزيتسيياسىن ايقىندادى. بۇل تاۋارلار تٸزٸمٸ – يمپورتتى الماستىرۋ بويىنشا بيزنەستٸڭ جاڭا تولقىنىن تۋعىزۋ كەرەك. وسى باعىتتاعى ينۆەستيتسييالىق جوبالاردى جٷزەگە اسىرۋعا قازٸر 180 كەسٸپورىن قىزىعۋشىلىق تانىتىپ وتىر», - دەدٸ اسقار مامين ەلوردادا ٶتٸپ جاتقان «Samruk Business Forum» شاراسىندا.
ٷكٸمەت باسشىسى دەسە دە بۇل ٸسكە ٶتە جٸتٸ زەرتتەۋ كەرەكتٸگٸن ەسكەرتتٸ.
«بيزنەس جاڭا جۇمىس ورىندارىن قۇرىپ, ساپالى ٶنٸمدەردٸ شىعارۋ بويىنشا ٶز مٸندەتتەمەلەرٸن قابىلداۋى كەرەك. وتاندىق تاۋارلار ٶندٸرٸسٸن دامىتۋ ٷشٸن ەكٸنشٸ دەڭگەيلٸ بانكتەردٸ ٸرٸكتەۋ جەنە قارجىلاندىرۋ جۇمىسىنا بەلسەندٸ تٷردە اتسالىسۋعا شاقىرامىن», - دەدٸ ول.
