قر پرەزيدەنتٸ قاسىم-جومارت توقاەۆ سايلاۋ ٶتكەننەن كەيٸن زاڭعا سەيكەس ٷكٸمەت وتستاۆكاعا كەتۋٸ تيٸستٸگٸن ايتتى, دەپ حابارلايدى "ۇلت اقپارات".
«سايلاۋدىڭ ٶزٸنە قاتىستى ايتار بولسام, ونىڭ ەدٸل ٶتەتٸندٸگٸنە سەنەمٸن. قالاي دەگەندە دە بيلٸك تاراپىنان بۇل سايلاۋدى ەدٸل ٶتكٸزۋدٸ قامتاماسىز ەتۋ ٷشٸن بارلىعى جاسالدى. بارلىق كانديداتقا تەڭدەي مٷمكٸندٸك بەرٸلدٸ. سوندىقتان سايلاۋدىڭ قورىتىندىسىن ول اياقتالعاننان كەيٸن شىعاراتىن بولامىز», - دەدٸ قاسىم-جومارت توقاەۆ ەلورداداعى وقۋشىلار سارايىندا ورنالاسقان №58 سايلاۋ ۋچاسكەسٸندە داۋىس بەرگەننەن كەيٸن باق ٶكٸلدەرٸنە بەرگەن سۇحباتىندا.
وسى رەتتە مەملەكەت باسشىسى ەلٸمٸزدٸڭ زاڭىنا سەيكەس سايلاۋ ٶتكەننەن كەيٸن ەل ٷكٸمەتٸ وتستاۆكاعا كەتۋٸ تيٸستٸگٸن ايتتى.
«ٷكٸمەتكە قاتىستى ايتار بولسام, بٸزدٸڭ زاڭنامامىزعا سەيكەس, ول وتستاۆكاعا كەتۋٸ تيٸس. سايلاۋ اياقتالعاننان كەيٸن, تاياۋ ۋاقىتتا پرەمەر-مينيستردٸڭ, سونىمەن قاتار ٷكٸمەت مٷشەلەرٸنٸڭ كانديداتۋرالارى بويىنشا دەپۋتاتتاردىڭ جاڭا قۇرامىمەن, فراكتسييا باسشىلارىمەن كەڭەسۋ ٷشٸن پارلامەنتكە بارامىن. سٸزدەر جەدەل اقپارات الاسىزدار دەپ ويلايمىن», - دەدٸ قر پرەزيدەنتٸ.
