قر پرەزيدەنتٸ قاسىم-جومارت توقاەۆ ٸشكٸ ٸستەر مينيسترٸ ەرلان تۇرعىمباەۆتى قابىلدادى, دەپ حابارلايدى اقوردا.
قاسىم-جومارت توقاەۆقا پرەزيدەنتتٸڭ بيىلعى قازاقستان حالقىنا ارناعان «جاڭا جاعدايداعى قازاقستان: ٸس-قيمىل كەزەڭٸ» جولداۋىن جٷزەگە اسىرۋ, اتاپ ايتقاندا, تٶتەنشە جاعداي كوميتەتٸن ٸشكٸ ٸستەر مينيسترلٸگٸنٸڭ قۇرامىنان بٶلۋ جۇمىستارى جايىندا باياندالدى.
مينيستردٸڭ ايتۋىنشا, بٷگٸندە ارنايى كوميسسييا قۇرىلىپ, الداعى ۋاقىتتا تٶتەنشە جاعدايلار جٶنٸندەگٸ مينيسترلٸكتٸڭ قۇرامىندا قىزمەت ەتەتٸن 25 مىڭعا جۋىق ادامنىڭ تٸزٸمٸ ناقتىلانىپ, قاجەتتٸ تەحنيكالار مەن قۇرال-جابدىقتار بٶلٸنٸپ جاتىر. بۇل جۇمىستاردىڭ بارلىعى بٸر ايدىڭ ٸشٸندە اياقتالادى.
سونىمەن قاتار ەرلان تۇرعىمباەۆ «پوليتسييا قادامدىق قولجەتٸمدٸلٸكتە» قاعيداتى بويىنشا رەفورمالاۋ جۇمىسىنىڭ بارىسى تۋرالى ايتتى. مينيستر اتالعان قاعيدات بويىنشا جەرگٸلٸكتٸ پوليتسييا قىزمەتكەرلەرٸ ماتەريالدىق تۇرعىدان تولىق جابدىقتالىپ, ولاردىڭ رەسپۋبليكانىڭ بارلىق اۋماعىندا حالىقپەن تىعىز جۇمىس ٸستەۋٸنە وڭتايلى جاعداي جاسالاتىنىن جەتكٸزدٸ. وسى ماقساتتا ۋچاسكەلٸك پوليتسييا قىزمەتكەرلەرٸنٸڭ مەرتەبەسٸ زاڭمەن بەكٸتٸلٸپ, ولار اۆتوكٶلٸكپەن, فوتو-ۆيدەو باقىلاۋ قۇرىلعىلارىمەن, ەلەكتروندى پلانشەتتەرمەن قامتاماسىز ەتٸلەدٸ.
بۇدان بٶلەك, كەزدەسۋدە ٸشكٸ ٸستەر مينيسترلٸگٸنٸڭ جۇمىسىن تسيفرلاندىرۋ مەسەلەسٸ دە قوزعالدى. قازٸردٸڭ ٶزٸندە مينيسترلٸك جۇمىسىنىڭ 83% ەلەكتروندى فورماتقا كٶشكەن. جىل سوڭىنا دەيٸن بۇل مەجەنٸ 91% جەتكٸزۋ كٶزدەلٸپ وتىر.
كەزدەسۋ سوڭىندا پرەزيدەنت قاسىم-جومارت توقاەۆ ەرلان تۇرعىمباەۆقا قولعا العان رەفورمالاردى نەتيجەلٸ ٸسكە اسىرۋ كەرەك ەكەنٸن ايتىپ, مينيسترلٸكتٸڭ الدىنا ناقتى مٸندەتتەر قويدى.
