قازاقستاننىڭ بٸرٸنشٸ, ەلەمنٸڭ 56-راكەتكاسى الەكساندر بۋبليك گامبۋرگ ATP تۋرنيرٸنٸڭ ەكٸنشٸ اينالىمىنا شىقتى, دەپ حابارلايدى "ۇلت اقپارات".
قازاقستاندىق تەننيسشٸ العاشقى اينالىمدا ەلەمنٸڭ 44-راكەتكاسى, يسپانييالىق البەرت راموسپەن كٷش سىناستى.
بۇدان بۇرىن ا.بۋبليك ٸرٸكتەۋ سايىستارىنىڭ فينالىندا امەريكالىق توممي پولعا ەسە جٸبەرٸپ, نەگٸزگٸ تۋرنيرگە ٶتە الماي قالعان ەدٸ. دەگەنمەن ريم ماستەرس تۋرنيرٸنٸڭ فيناليسٸ, ارگەنتينالىق ديەگو شۆارتسمان گامبۋرگكە كەلمەي قالدى دا, ورنىنا قازاقستاندىق تەننيسشٸ شاقىرتۋ الدى.
ا.بۋبليك بيىل 23-كە تولسا, ونىڭ تەجٸريبەلٸ قارسىلاسى 32-دە ەدٸ.
بٸرٸنشٸ پارتييادا بٸردەن برەيك جاساعان قازاقستاندىق سپورتشى العا شىقتى – 2:0. سول قارقىنىنان جاڭىلماي, ايقىن باسىمدىلىقپەن اياقتاي بٸلدٸ – 6:2.
ەكٸنشٸ سەتتە ەسەپ 1:1 بولعان مەزەتتە يسپانييالىق تەننيسشٸ برەيك جاساپ كەتتٸ. بۋبليك تە قالىسپاي, قايىرا برەيكپەن بٸرگە ٶز گەيمٸن الىپ, العا شىقتى – 3:2. ا.راموس دوپ بەرگەندە, بەسەكە تارتىستىراق ٶربٸپ, الەكساندردىڭ تاعى برەيك جاسايتىنداي مٷمكٸندٸگٸ بولدى. دەگەنمەن ول تاي-برەيكتە ٶز مٷمكٸندٸگٸن جٸبەرمەدٸ – 7:6 (7:5).
ماتچ 1 ساعات 51 مينۋتقا سوزىلدى.
ا.بۋبليك جٷلدە قورى 1,2 ملن ەۋرودان اساتىن دودانىڭ ەكٸنشٸ اينالىمىندا 20 جاستاعى كانادالىق, ەلەمنٸڭ 21-راكەتكاسى فەليكس وجە-الياسسيممەن شەبەرلٸك بايقاسادى. ول باستاپقى كەزدەسۋٸندە رەيتينگتە 46-ورىنداعى يتالييالىق لورەنتسو سونەگونى 6:2, 7:6 (7:2) ەسەبٸمەن تٸزە بٷكتٸردٸ.
