قازاقستاندىق تيموفەي سكاتوۆ ٶز سپورتتىق جولىندا العاش رەت «ٷلكەن دۋلىعا» تۋرنيرٸندە وينايدى, دەپ حابارلايدى قازاقپارات.
قازاقستان تەننيس فەدەراتسيياسى مەلٸم ەتكەنٸندەي, Cكاتوۆ اۋسترالييا اشىق چەمپيوناتى ٸرٸكتەۋ سايىستارىنىڭ فينالىندا پورتۋگالييالىق گاشتاۋ ەلياشپەن كەزدەستٸ.
قازاقستاندىق تەننيسشٸ 6:4, 7:6 (7:5) ەسەبٸمەن جەڭٸسكە جەتتٸ. ەكٸنشٸ پارتييادا تيموفەي 2:5 ەسەبٸمەن ۇتىلىپ جاتىپ, تارازى باسىن تەڭەستٸرە بٸلدٸ. سودان كەيٸن تاي-برەيكتە جەڭٸستٸ جۇلىپ الدى. 1 ساعات 43 مينۋتقا سوزىلعان بەسەكە بارىسىندا سكاتوۆ ەيس جاساماعانىمەن, 7 برەيك-پوينتتىڭ تٶرتەۋٸن پايدالاندى. قارسىلاسى 8 ەيس, 3 برەيككە (5 برەيك-پوينت) قول جەتكٸزدٸ.
وسىلايشا 20 جاستاعى پەتروپاۆل قالاسىنىڭ تۋماسى تيموفەي ەرەسەكتەر اراسىندا بٸرٸنشٸ رەت Grand Slam دوداسىندا باق سىناماق. بۇعان دەيٸن ول جاسٶسپٸرٸمدەر اراسىندا «ٷلكەن دۋلىعادا» ٶنەر كٶرسەتٸپ, 2017 جىلى US Open جارىسىندا جارتىلاي فينالعا دەيٸن جەتتٸ.
تاعى بٸر قازاقستاندىق دميتريي پوپكو ٸرٸكتەۋ سايىستارىنىڭ فينالىندا چەحييالىق يرجي لەحەچكاعا 6:4, 3:6, 3:6 ەسەبٸمەن ەسە جٸبەرٸپ, نەگٸزگٸ تۋرنيرگە ٶتە الماي قالدى.
