قازاقستاننىڭ بٸرٸنشٸ, ەلەمنٸڭ 19-راكەتكاسى ەلەنا رىباكينا دۋباي تۋرنيرٸنٸڭ جارتىلاي فينالىنا شىقتى, دەپ حابارلايدى "ۇلت اقپارات".
ە.رىباكينانىڭ بۇل جولعى قارسىلاسى ٶتە مىقتى, ەلەمنٸڭ ٷشٸنشٸ, وسى دودانىڭ 2-راكەتكاسى, چەحييالىق كارولينا پليشكوۆا ەدٸ.
بٸرٸنشٸ پارتييادا ەسەپ 2:3 بولعان مەزەتتە دوپ بەرگەن قازاقستاندىق تەننيسشٸ قاتەلٸككە بوي الدىرىپ, قارسىلاسىنىڭ برەيك جاساپ كەتتٸ. دەگەنمەن ٸلە-شالا قايىرا برەيككە قول جەتكٸزٸپ, تارازى باسىن تەڭەستٸردٸ – 4:4. ال تاي-برەيكتە 20 جاستاعى رىباكينا 1992 جىلعى تەجٸريبەلٸ قارسىلاسىنا بٸر عانا ۇپاي بەردٸ – 7:6 (7:1).
ەكٸنشٸ سەتتٸ باستاعان ەلەنا پليشكوۆانىڭ برەيك جاساۋىنا جول بەرمەي, ٶزٸ سونداي مٷمكٸندٸكتٸ مٷلت جٸبەرمەدٸ – 2:0. اقىرى ەسەپ 5:3 بولىپ, ماتچقا دوپ بەرگەندە, قاتەلەسكەن جوق – 6:3.
تارتىستى بەسەكە 1 ساعات 40 مينۋتقا سوزىلدى.
وسىلايشا قازاقستاندىق تەننيسشٸ بٸر تۋرنيردٸڭ ٶزٸندە رەيتينگتە ٷزدٸك وندىققا كٸرەتٸن ەكٸ سپورتشىنى ۇتىپ وتىر. بۇدان بۇرىن ول العاشقى اينالىمدا ەلەمنٸڭ 7-راكەتكاسى, بيىلعى اۋسترالييا اشىق چەمپيوناتىنىڭ جەڭٸمپازى, امەريكالىق سوفييا كەنيندٸ تٸزە بٷكتٸرگەن بولاتىن.
ە.رىباكينا پرەمەر دەڭگەيٸندەگٸ دۋباي جارىسىنىڭ (جٷلدە قورى 3 ملن اقش دوللارىنا جۋىق) فينالىنا شىعۋ ٷشٸن ەلەمنٸڭ 15-راكەتكاسى, حورۆاتييالىق پەترا مارتيچ نەمەسە رەيتينگتە 24-ورىنداعى ەستونييالىق انەتت كونتاۆەيتتٸڭ بٸرەۋٸمەن تالاسادى.
ەسكە سالا كەتەيٸك, بۇدان بۇرىن ە.رىباكينانىڭ دۋبايدا, ال الەكساندر بۋبليكتٸڭ مارسەلدە شيرەك فينالعا شىققانىن جازعان بولاتىنبىز.
