Qazaqstannyń birinshi, álemniń 19-raketkasy Elena Rybakina Dýbai týrniriniń jartylai finalyna shyqty, dep habarlaidy "Ult aqparat".
E.Rybakinanyń bul jolǵy qarsylasy óte myqty, álemniń úshinshi, osy dodanyń 2-raketkasy, chehiialyq Karolina Plishkova edi.
Birinshi partiiada esep 2:3 bolǵan mezette dop bergen qazaqstandyq tennisshi qatelikke boi aldyryp, qarsylasynyń breik jasap ketti. Degenmen ile-shala qaiyra breikke qol jetkizip, tarazy basyn teńestirdi – 4:4. Al tai-breikte 20 jastaǵy Rybakina 1992 jylǵy tájiribeli qarsylasyna bir ǵana upai berdi – 7:6 (7:1).
Ekinshi setti bastaǵan Elena Plishkovanyń breik jasaýyna jol bermei, ózi sondai múmkindikti múlt jibermedi – 2:0. Aqyry esep 5:3 bolyp, matchqa dop bergende, qatelesken joq – 6:3.
Tartysty báseke 1 saǵat 40 minýtqa sozyldy.
Osylaisha qazaqstandyq tennisshi bir týrnirdiń ózinde reitingte úzdik ondyqqa kiretin eki sportshyny utyp otyr. Budan buryn ol alǵashqy ainalymda álemniń 7-raketkasy, biylǵy Aýstraliia ashyq chempionatynyń jeńimpazy, amerikalyq Sofiia Kenindi tize búktirgen bolatyn.
E.Rybakina premer deńgeiindegi Dýbai jarysynyń (júlde qory 3 mln AQSh dollaryna jýyq) finalyna shyǵý úshin álemniń 15-raketkasy, horvatiialyq Petra Martich nemese reitingte 24-oryndaǵy estoniialyq Anett Kontaveittiń bireýimen talasady.
Eske sala keteiik, budan buryn E.Rybakinanyń Dýbaida, al Aleksandr Býbliktiń Marselde shirek finalǵa shyqqanyn jazǵan bolatynbyz.
