پاۆلوداردا تاكسي جٷرگٸزۋشٸسٸ مەن پوليتسەيلەر زەينەتكەردٸڭ الاياقتارعا بەرٸپ قويعان 5 ملن 970 مىڭ تەڭگەسٸن تولىق قايتارۋعا كٶمەكتەستٸ, دەپ حابارلايدى ult.kz.
Polisia.kz مەلٸمەتٸنشە, وقيعا كٶلٸك جۋۋ ورىندارىنىڭ بٸرٸندە بولعان. تاكسي جٷرگٸزۋشٸسٸ الماتىعا سٶمكە جەتكٸزۋٸ كەرەك بولعان. جولعا شىعار الدىندا سٶمكەدەن جارمانىڭ تٶگٸلٸپ جاتقانىن بايقاپ, ٸشٸن تەكسەرگەن. سٶمكەدەن قوماقتى اقشا تابىلعان سوڭ, ول بٸردەن پوليتسيياعا حابارلاسقان.
پوليتسەيلەر اقشانىڭ يەسٸن انىقتاپ, ونىمەن بايلانىسقا شىققان. زەينەتكەر تەلەفون الاياقتارىنىڭ قۇربانى بولعانى بەلگٸلٸ بولدى.
الاياقتار الدىمەن ٶزدەرٸن ەنەرگييامەن جابدىقتاۋشى ۇيىمنىڭ قىزمەتكەرلەرٸ رەتٸندە تانىستىرىپ, ەلەكتر ەسەپتەگٸشتٸ اۋىستىرۋ ٷشٸن SMS-كودتى ايتقىزعان. كەيٸن «ەلەكتروندىق ٷكٸمەت» قىزمەتكەرلەرٸ رەتٸندە حابارلاسىپ, ونىڭ اتىنا نەسيە رەسٸمدەلگەنٸن ايتقان. نەسيەنٸ «جابۋ» ٷشٸن ەيەلدەن 5 ملن 970 مىڭ تەڭگە قولما-قول اقشا تالاپ ەتكەن.
اقشانى كۋرەر الىپ, تاكسي جٷرگٸزۋشٸسٸنە بەرگەن. ونىڭ قىراعىلىعى مەن پوليتسييا قىزمەتكەرلەرٸنٸڭ جەدەل ەرەكەتٸنٸڭ ارقاسىندا قاراجات تولىق كٶلەمدە يەسٸنە قايتارىلدى.
پوليتسييا بەيتانىس ادامدارعا SMS-كودتار مەن باسقا دا قۇپييا دەرەكتەردٸ بەرمەۋگە شاقىرادى. كٷدٸكتٸ قوڭىراۋ تٷسكەن جاعدايدا ەڭگٸمەنٸ توقتاتىپ, ۇيىمنىڭ رەسمي نٶمٸرٸنە ٶزٸڭٸز حابارلاسۋ قاجەت.
