فوتو:gov.kz
2024 جىلدىڭ بٸرٸنشٸ توقسانىندا سۇيىتىلعان مۇناي گازىنىڭ 1 ليترٸ شامامەن 5 تەڭگەگە قىمباتتايدى. بۇل تۋرالى ەنەرگەتيكا ۆيتسە-مينيسترٸ ەلٸبەك جاماۋوۆ ايتتى, دەپ حابارلايدى Kazinform.
«بٷگٸندە رەسپۋبليكادا ايىنا 135 مىڭ توننا سۇيىتىلعان مۇناي گازى ٶندٸرٸلەدٸ. تۇتىنۋ بۇدان دا كٶپ (ايىنا 140-145 مىڭ توننا - رەد.). سوعان بايلانىستى تاپشىلىق تۋىندايدى. اۆتوموبيل يەلەرٸنٸڭ كٶپشٸلٸگٸ سۇيىتىلعان مۇناي گازىنا اۋىسىپ جاتقانىن بٸلەمٸز. گاز بالونىن ورناتۋ رەتتەلمەيدٸ», - دەدٸ ول باق ٶكٸلدەرٸنە ارنالعان بريفينگتە.
ونىڭ اتاپ ٶتۋٸنشە, ٶندٸرٸس تۇتىنۋ كٶلەمٸن قامتاماسىز ەتە الماي وتىر.
«سوندىقتان دا بٸرقاتار شارا قابىلدادىق. تەڭٸزشەۆرويلمەن ٸشكٸ نارىققا اي سايىن 10 مىڭ توننا گاز جەتكٸزۋگە ۋاعدالاستىق. 13 قاراشادا سۇيىتىلعان مۇناي گازىنىڭ ەكسپورتىنا تولىق شەكتەۋ ەنگٸزدٸك. كازروسگاز كومپانيياسىمەن ورىنبور مۇناي ٶڭدەۋ زاۋىتىنان سۇيىتىلعان مۇناي گازىنىڭ قوسىمشا كٶلەمٸن باعىتتاۋ تۋرالى كەلٸستٸك. قازٸرگٸ ۋاقىتتا تاپشىلىق بايقالمايدى», - دەدٸ ۆيتسە-مينيستر.
بۇدان بٶلەك ول كەلەسٸ جىلدان گاز باعاسى كٶتەرٸلەتٸندٸگٸن ايتتى.
«ەنەرگەتيكا مينيسترلٸگٸ گاز باعاسىن بٸرتٸندەپ كٶتەرۋدٸ كٶزدەيدٸ. 2024 جىلدىڭ بٸرٸنشٸ توقسانىندا سۇيىتىلعان مۇناي گازىنىڭ 1 ليترٸ شامامەن 5 تەڭگەگە كٶتەرٸلەدٸ دەپ كٷتەمٸز. ودان كەيٸن الداعى 3 جىلدىڭ ٸشٸندە گاز باعاسى ەر 6 اي سايىن قىمباتتاپ وتىرماق», - دەدٸ ەلٸبەك جاماۋوۆ.
