سوۆەت ديسسيدەنتتەرٸنە ۇزاق جىل بويى كٶمەكتەسكەن انتوني دە مەييۋس 90 جاسىندا بەلگييادا قايتىس بولدى. ول سوۆەت عالىمدارىمەن, قۇقىق قورعاۋشىلارىمەن دوستىق قاتىناس ورناتتى. 1980 جىلى سوۆەت وداعىنان قۋىلعان اكادەميك, قۇقىق قورعاۋشى, نوبەل سىيلىعىنىڭ لاۋرەاتى اندرەي ساحاروۆتىڭ وتباسىمەن ارالاستى.
انتوني دە مەييۋس سسسر-دەگٸ ادام قۇقىعى تۋرالى استىرتىن جولدارمەن الىنعان اقپاراتتى باتىسقا تاراتىپ, Cahiers du Samizdat ("ساميزدات جازبالارى") شىعاردى.
ول سوۆەتتٸڭ جازالاۋ پسيحياتريياسى جايلى "سسسر ديسسيدەنتتەرٸنٸڭ بيوگرافييالىق سٶزدٸگٸ, 1956-1975" كٸتابىنا ەنگەن "اق كٸتاپتى" رەداكتسييالادى.
انتوني مەييۋس جايلى قازانامادا بەلگييانىڭ La Libre باسىلىمى ونىڭ 1991 جىلى مەسكەۋدەگٸ تامىز بٷلٸگٸ كەزٸندە مەسكەۋ تۇرعىندارى بٷلٸكشٸلەردەن تارتىپ العان تانك جانىندا تٷسكەن فوتوسۋرەتٸن جارييالادى.
1991 جىلعى تامىزدىڭ 19-ىندا كپسس ورتالىق كوميتەتٸ مەن سسسر ٷكٸمەتٸنٸڭ 8 مٷشەسٸنەن قۇرالعان توپ تٶتەنشە جاعدايلار جٶنٸندەگٸ مەملەكەتتٸك كوميتەت قۇرىپ, سوۆەت پرەزيدەنتٸ ميحايل گوربوچەۆتٸ قىزمەتٸنەن تايدىرماق بولعان ەدٸ. سوۆەت وداعىن ساقتاپ قالۋعا ۇمتىلعان بٷلٸك ٷش كٷننەن كەيٸن جەڭٸلگەن. "تامىز بٷلٸگٸنەن" كەيٸن كٶپ ۇزاماي سوۆەت وداعى ىدىراي باستاعان.
سوۆەت ٶكٸمەتٸ كەزٸندە قازاقستاندا دا قۋدالانعان ديسسيدەنتتەر مەن ديسسيدەنتتٸك ۇيىمدار بولعان.
