ەلەن راحمەتاليەۆ تٷسٸرگەن «سوڭعى مۇعالٸم» قىسقامەتراجدى فيلمٸ ەرەۆاندا ٶتكەن حالىقارالىق قىسقامەتراجدى فيلمدەرگە ارنالعان فەستيۆالدە ارنايى جٷلدەگە يە بولدى, دەپ حابارلايدى "ۇلت اقپارات".
كينوتۋىندىنى قر مەدەنيەت جەنە سپورت مينيسترلٸگٸ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋديياسى تٷسٸرگەن. فيلمدە حيمييا پەنٸنٸڭ مۇعالٸمٸ ەرجان قايدارۇلىنىڭ ٶمٸرٸ باياندالادى. ونىڭ ساباقتارىندا وقۋشىلار ٷنەمٸ شۋلاپ وتىرادى. بٸر كٷنٸ جوعارعى سىنىپ وقۋشىلارىنان جەبٸر كٶرگەن ۇلىن قورعاماق بولعان ۇستاز ولارمەن كٷرەسپەك بولادى.
«فيلمنٸڭ وسىنداي جەتٸستٸكتەرٸ ەرينە قۋانتادى. مەن بۇل فەستيۆالگە بارا المادىم. الايدا وسى بايقاۋعا مەنٸڭ كۋرستاسىم, دوسىم دارحان تٶلەگەنوۆ قاتىستى. ونىڭ «اننا» اتتى فيلمٸ دە نەگٸزگٸ باعدارلامادا كٶرسەتٸلگەن بولاتىن. دارحاننىڭ ايتۋىنا قاراعاندا, وتاندىق فيلمدەر كٶرەرمەندەر مەن فەستيۆال قوناقتارىنىڭ كٶڭٸلدەرٸنەن شىقتى. بۇل قازاق كينو ٶنەرٸنٸڭ دامۋىنىڭ بٸردەن بٸر ايعاعى, - دەدٸ رەجيسسەر ەلەن راحمەتاليەۆ.
Yerevan International Short Film Festival فەستيۆالٸ دوستىق جەنە جاھاندىق ىنتىماقتاستىقتى دامىتۋدى كٶزدەيدٸ. سونداي-اق فەستيۆالدٸڭ باستى ماقساتى - ەلەمنٸڭ ٷزدٸك قىسقامەتراجدى فيلمدەرٸن كٶرسەتۋگە بولاتىن ارنايى الاڭ اشىپ, ارمەنييانىڭ كينو ٶندٸرٸسٸن دامىتۋ. بيىل فەستيۆالگە قاتىسۋعا 65 مەملەكەتتەن 650 ٶتٸنٸمدەر كەلٸپ تٷسكەن ەكەن. ايتا كەتسەك, فەستيۆالدٸڭ ديرەكتورى اتىنان بەرٸلگەن بۇل ارنايى جٷلدە وتاندىق جاس رەجيسسەر تٷسٸرگەن دارحان تٶلەگەنوۆتىڭ «اننا» اتتى فيلمٸنە دە بۇيىردى.
ەسكە سالساق, اتالعان فيلم ىستانبۇلدا ٶتكەن Dostluk Kısa Film Festival حالىقارالىق كينوفەستيۆالٸندە ەكٸنشٸ ورىندى يەمدەنگەن ەدٸ.
