جەلٸدە جٸگٸتتٸ ەسكەري كوميسسارياتقا كٷشپەن "الىپ كەتكەن" پوليتسەيلەردٸڭ ۆيدەوسىنا قاتىستى قورعانىس مينيسترلٸگٸ تٷسٸنٸك بەردٸ, - دەپ حابارلايدى Tengrinews.kz.
"22 سەۋٸردە پوليتسييا قىزمەتكەرلەرٸ شىمكەنتتە جوسپارلى رەيدتٸك ٸس-شارالار جٷرگٸزدٸ. اتاپ ايتقاندا, قورعانىس ۆەدومستۆولارىنىڭ شاقىرتۋلارى بويىنشا كەلمەي, شاقىرتۋدان جالتارعان مەرزٸمدٸ ەسكەري قىزمەتشٸلەردٸ ٸزدەستٸرۋ جۇمىستارى جٷرگٸزٸلدٸ. نەتيجەسٸندە 6 ەسكەرگە شاقىرىلۋشى ەسكەري كوميسسارياتقا كٷشپەن جەتكٸزٸلدٸ", - دەلٸنگەن حابارلامادا.
مينيسترلٸك رەيدتەردٸڭ قورىتىندىسى بويىنشا اتا-انالار مەن ەسكەرگە شاقىرىلعاندار تاراپىنان قورعانىس بٶلٸمٸنە شاعىم تٷسپەگەنٸن ايتتى.
"سونىمەن قاتار, كٶبٸنەسە كٶرسەتٸلگەن مەكەنجايدا تۇرمايتىن, اتا-انالارى جاسىرىپ جٷرگەن ەسكەرگە شاقىرىلۋشىلارعا شاقىرۋ قاعازىن بەرۋ مەسەلەسٸ ٶزەكتٸ كٷيٸندە قالىپ وتىر. شىمكەنت قالاسىندا 300-دەن استام ەسكەرگە شاقىرىلعان سارباز شاقىرتۋ العان. بٸراق ولار مەديتسينالىق كوميسسييادان ٶتۋ ٷشٸن شاقىرۋ ۋچاسكەلەرٸنە كەلمەيدٸ", - دەلٸنگەن قورعانىس مينيسترلٸگٸنٸڭ حابارلاماسىندا.
