شىمكەنت قالاسىندا كوروناۆيرۋس تابىلعان سوڭ قالانىڭ كٸرەبەرٸسٸنە 12 بلوكپوست قويىلدى.
پوليتسەيلەر مەن دەرٸگەرلەر شىمكەنتكە كٸرەتٸن ەربٸر كٶلٸكتٸ توقتاتىپ, ادامداردىڭ دەنە قىزۋىن ٶلشەپ جاتىر. جەرگٸلٸكتٸ ەكٸمدٸكتٸڭ حابارلاۋىنشا, بۇل بەكەتتەردە پوليتسييا, دەرٸگەرلەر, جەدەل-جەردەم, تٶتەنشە جاعداي قىزمەتكەرلەرٸ تەۋلٸك بويى قىزمەت ەتەدٸ.
24 ناۋرىز كەشكٸسٸن شىمكەنتتە 1996 جىلى تۋعان ادامنان كوروناۆيرۋس تابىلعان. رەسمي دەرەك بويىنشا, ول قالاعا بٸرنەشە كٷن بۇرىن نۇر-سۇلتاننان كەلگەن.
قازاقستاندا كوروناۆيرۋسقا بايلانىستى 15 سەۋٸرگە دەيٸن تٶتەنشە جاعداي. 19 ناۋرىزدان باستاپ الماتى مەن نۇر-سۇلتان قالالارى كارانتينگە كٶشتٸ. وسىدان كەيٸن ەكٸ قالادا وقيتىن يا ۋاقىتشا جٷرگەن ادامدار ٶز قالالارىنا جاپپاي قايتا باستاعان.
قازٸرگٸ دەرەك بويىنشا, قازاقستاندا 79 ادام كوروناۆيرۋس جۇقتىرعان. الماتىدا - 31 ادام, نۇر-سۇلتاندا - 41 ادام, قاراعاندىدا - 2 ادام, الماتى وبلىسىندا - بٸر ادام, اقتٶبە وبلىسىندا - بٸر ادام, شىمكەنتتە - بٸر ادام, جامبىل وبلىسىندا - بٸر ادام, سولتٷستٸك قازاقستان وبلىسىندا بٸر ادام ەمدەلٸپ جاتىر.
