بٸز قازاق باسىمىزدان تالاي قيىن-قىستاۋ كەزەڭدەردٸ, وقيعالاردى ٶتكٸزدٸك. قازٸر جاسى توقسانعا كەلٸپ وتىرعان مەنٸڭ ٶزٸم اشارشىلىقتىڭ, سوعىستىڭ كۋەگەرٸمٸن.
سول نەۋبەتتەر كەزٸندە ەت جاقىندارىمىزدان ايىرىلدىق. تەك ەكٸنشٸ دٷنيەجٷزٸلٸك سوعىستىڭ ٶزٸندە قانشاما قازاق قىناداي قىرىلدى. بٸراق بٸزدٸڭ حالىق قانداي اۋىر كەزەڭدەردە دە ادامگەرشٸلٸكتٸ ساقتاي بٸلگەنٸن ۇمىتپاۋىمىز كەرەك. ٶز باسىنا كٷن تۋعان كەزەڭدەردە دە باسقالارعا قول ۇشىن سوزۋدى ادامدىق پارىز دەپ ەسەپتەدٸ. قازاقتىڭ ٶزگە ۇلتتارعا پانا بولعانىن ايتپاي-اق, تەك «لەنينگرادتىق ٶرەنٸم» دەيتٸن جامبىل اتامىزدىڭ ەيگٸلٸ جىرىن ەسكە تٷسٸرسەك تە جەتكٸلٸكتٸ. سول جىردىڭ مىڭداعان لەنينگرادتىققا كٷش بەرگەنٸ, جۇباتقانى, بەيبٸت ٶمٸرگە تالپىندىرعانى كٷنٸ كەشەگٸدەي ەسٸمٸزدە.
وتانداستارىمدى, جالپى باۋىرلارىمدى وسى قاۋٸپتٸ ەرٸ قاتەرلٸ ٸندەت كەزٸندە سابىر ساقتاۋعا شاقىرامىن. ەڭ الدىمەن جاسى ٷلكەن اتا-ەجەلەرٸڭدٸ, بالا-شاعالارىڭدى قورعاپ, ولاردىڭ ٶمٸرٸنە قاۋٸپ تٶندٸرمەڭدەر دەگٸم كەلەدٸ. كارانتين تالاپتارىن ورىنداپ, تەرتٸپكە باعىنساق, شىدامدىلىق تانىتساق, بٸز كٷتكەن جاقسى كٷندەر ەرتەرەك تۋاتىنى انىق. يە, ول بٸزدٸڭ سابىرىمىزعا, تٶزٸمٸمٸزگە بايلانىستى بولىپ تۇر. باسقا تٷسكەن قيىندىقتى سابىرمەن عانا جەڭەمٸز. بۇل جاعداي تەك بٸزدٸڭ ەمەس, دٷنيەجٷزٸ حالىقتارىنىڭ باسىنان ٶتٸپ جاتىر. سول ٷشٸن بٸرٸنشٸ كەزەكتە ازاماتتىق قادٸر-قاسيەتٸمٸزگە كٶلەڭكە تٷسپەسە ەكەن. وتانداستارىما دا وسىنى تٸلەيمٸن. ەت جاقىندارىمىزدى دا بارىنشا قورعايىق, ازاماتتىعىمىزدى دا جوعالتپايىق.
مۇنداي قيىن-قىستاۋ شاقتا مەملەكەتٸمٸزدٸڭ باسشىسى قاسىم-جومارت توقاەۆتىڭ تٶڭٸرەگٸنە توپتاسىپ, تىعىرىقتان شىعۋ جولدارىن بٸرلەسە ٸزدەگەنٸمٸز جٶن دەپ بٸلەمٸن.
تٶرەگەلدٸ شارمانوۆ,
قازاق تاعامتانۋ اكادەميياسىنىڭ پرەزيدەنتٸ, اكادەميك, مەملەكەتتٸك سىيلىقتىڭ لاۋرەاتى
