جامبىل وبلىسى پوليتسييا دەپارتامەنتٸنٸڭ ەسٸرتكٸ قىلمىسىنا قارسى ٸس-قيمىل باسقارماسىنىڭ قىزمەتكەرلەرٸ جەدەل-ٸزدەستٸرۋ بارىسىندا شۋ اۋدانىنىڭ 44 جاستاعى تۇرعىنىن ۇستادى, دەپ حابارلايدى "ۇلت اقپارات".
تۇرعىننىڭ ٷيٸن تٸنتۋ بارىسىندا جالپى سالماعى 10 كەلٸ 120 گرامم «كەپتٸرٸلگەن ماريحۋانا», 210 گرامم «گاشيش», سونداي-اق 17 كەلٸ 480 گرامم ماريحۋانا تۇقىمى سالىنعان 14 پلاستيكالىق ىدىس پەن قاپ تابىلىپ, تەركٸلەندٸ.
اتالعان دەرەككە قاتىستى قر قىلمىستىق كودەكسٸنٸڭ 296-بابى 4-بٶلٸگٸ بويىنشا سوتقا دەيٸنگٸ تەرگەۋ امالدارى باستالعان.
ۇستالعان ازامات كٸنەسٸن تولىق مويىنداپ, شۋ اۋدانىنىڭ ۋاقىتشا ۇستاۋ يزولياتورىنا قاماققا الىندى.
جامبىل وبلىسى پوليتسييا دەپارتامەنتٸنٸڭ ەسٸرتكٸ قىلمىسىنا قارسى ٸس-قيمىل باسقارماسىنىڭ باستىعى, پوليتسييا پولكوۆنيگٸ اسقار جۇمابەكوۆ تەركٸلەنگەن 17 كەلٸ 480 گرامم تۇقىمنان قىلمىسكەرلەر 2 گەكتارعا دەيٸنگٸ القاپقا ماريحۋانا ٶسٸرە الاتىنىن اتاپ كٶرسەتتٸ.
