شىعىس قازاقستان وبلىسىندا زەينەتكەردٸڭ 18 ملن تەڭگەسٸن ۇرلاپ كەتتٸ, دەپ حابارلايدى "ۇلت اقپارات".
ريددەر قالاسىنىڭ پوليتسييا بٶلٸمٸنە 65 جاستاعى قارييا ارىزداندى. زەينەتكەر ٷيگە بەلگٸسٸز بٸرەۋدٸڭ كٸرٸپ, جاتىن بٶلمەدەگٸ شكافتا تۇرعان اقشاسىن ۇرلاپ كەتكەنٸن جەتكٸزگەن. جەدەل ەرەكەت ەتكەن شقو پد كريمينالدىق پوليتسييا باسقارماسىنىڭ قىزمەتكەرلەرٸ بٸرنەشە كٷن ٸشٸندە كٷدٸكتٸنٸ قولعا تٷسٸردٸ.
«انىقتالعانداي, ٷي ٸشٸندە ەشكٸمنٸڭ جوق ەكەنٸنە كٶز جەتكٸزگەن ۇرى تەرەزە ارقىلى كٸرگەن. جاتىن بٶلمەدەگٸ شكافتان شەتەل ۆاليۋتاسىنداعى 18 ملن تەڭگەدەن استام اقشا سالىنعان پاكەتتٸ الىپ, وقيعا ورنىنا ٸزٸن سۋىتادى. ريددەر قالاسىنىڭ 41 جاستاعى تۇرعىنى ٶز كٸنەسٸن مويىنداپ وتىر», - دەدٸ دەپارتامەنت باستىعىنىڭ ورىنباسارى تالعات شاياحمەتوۆ.
ەر ادام اقشانىڭ بٸراز بٶلٸگٸن تىعىپ قويعانىن, قالعانىن ٶزٸمەن بٸرگە ٶسكەمەنگە الىپ كەتكەنٸن ايتتى. تەرتٸپ ساقشىلارى ونىڭ ٷيٸن تٸنتۋ بارىسىندا اقشانى تاپتى. كٷدٸكتٸ ۇرلانعان قاراجاتتىڭ بٸرازىنا قىمبات سمارتفوندار, كيٸم-كەشەك پەن التىن بۇيىمدار ساتىپ العان. قالعان سوما جەبٸرلەنۋشٸگە قايتارىلىپ بەرٸلدٸ.
قازٸرگٸ ۋاقىتتا پوليتسەيلەر قر قىلمىستىق كودەكسٸنٸڭ 188-بابى 4-بٶلٸگٸ بويىنشا سوتقا دەيٸنگٸ تەرگەۋ امالدارىن باستادى.
