شىعىس قازاقستان وبلىسىنىڭ جارما اۋدانىنداعى جاڭاٶزەن اۋىلىنا زەرە اتاۋىن بەرۋ ۇسىنىلدى, دەپ حابارلايدى "ۇلت اقپارات" altaynews.kz سايتىنا سٸلتەمە جاساپ.
اقجال اۋىلدىق وكرۋگٸنٸنٸڭ ورتالىعى جاڭاٶزەن اۋىلىندا تۇرعىنداردىڭ قاتىسۋىمەن جيىن ٶتتٸ. وندا ەلدٸ مەكەن اتاۋىن ٶزگەرتۋ مەسەلەسٸ قارالدى. اتاپ ٶتٸلگەندەي, جاڭاٶزەن اۋىلىنا ۇلى ابايدىڭ ەجەسٸ زەرەنٸڭ ەسٸمٸن بەرۋ ۇسىنىسى بۇعان دەيٸن جاسالعان.
اۋىل بۇرىن نوۆورەچەنسك اتالعان, كەيٸننەن تۋرا اۋدارماسىمەن جاڭاٶزەن اۋىلى دەپ ٶزگەرتٸلگەن.
«ٶزەنننٸڭ جاڭاسى بولمايدى. ٶزەننٸڭ شار دەگەن ٶز اتاۋى بار. وسىنى ەسكەرە وتىرىپ, اۋىلدىڭ اتاۋىن تەگٸ جارما ٶڭٸرٸنەن شىققان, ٶسكەنباي بيدٸڭ بەيبٸشەسٸ, قۇنانباي قاجىنىڭ اناسى, ابايدىڭ ەجەسٸ, ازان شاقىرىپ قويعان اتى - توقبالا, كەيٸننەن زەرە اتانعان, م.ەۋەزوۆتىڭ «ابايدىڭ تۋىسى مەن ٶمٸرٸ» اتتى ماقالاسى مەن «اباي جولى» رومانىندا الاش ايناسى اتانعان زەرەنٸڭ اتىمەن اتاۋعا وكرۋگ تۇرعىندارى اتىنان ۇسىنىس ەنگٸزەمٸن», - دەدٸ اۋىلدىق وكرۋگ ەكٸمٸ نۇرلىبەك ەليياسوۆ.
بۇعان دەيٸن دە بٸرنەشە مەرتە كٶتەرٸلگەن ۇسىنىستى وكرۋگ تۇرعىندارى بٸراۋىزدان قولدادى. كەزەكتەن تىس ٶتكەن جيىننىڭ قورىتىندىسى بويىنشا, جاڭاٶزەن اۋىلىن زەرە انا ەسٸمٸنە اۋىستىرۋ جٶنٸندە شەشٸم قابىلداندى.
