فوتو: اشىق دەرەككٶز
بلوگەر ەربول مەندٸبەك شەتەلدە جۇمىس ٸستەۋ قازاققا مٸندەتتٸ تٷردە بايلىق ەكەلمەيتٸنٸن ايتىپ, وتانداستاردى ٶز ەلٸندە ەڭبەكتەنۋگە شاقىردى. ونىڭ ايتۋىنشا, كٶپشٸلٸك شەتەلدە قۇلپىناي تەرٸپ, ىدىس جۋۋدى نامىس كٶرمەيدٸ, بٸراق دەل سونداي قارا جۇمىستى قازاقستاندا ٸستەگٸسٸ كەلمەيدٸ, دەپ حابارلايدى Ult.kz.
مەندٸبەكتٸڭ ايتۋىنشا, شەتەلدە تاپقان قاراجاتتىڭ باسىم بٶلٸگٸ تۇرمىسقا كەتەدٸ, سوندىقتان قولدا قالاتىنى شامامەن 300 مىڭ تەڭگەنٸڭ اينالاسى.
"ەۋروپالىق ينفلياتسييامەن ەسەپتەپ قاراساڭ اقشاسىنىڭ ايىرماشىلىعى كٶپ ەمەس. مىسالى مەن جۇمىسسىز قالعاندا قاراپ جاتپاي تاكسي بولدىم, تاماق تاسۋشى بولدىم, تٸپتٸ جٷك تە تٷسٸردٸم. جاپ-جاقسى تابىس تاپتىم. ورتاشا ەسەپپەن ايىنا 400-450 مىڭ تابىس بولدى", - دەيدٸ ول.
وسىدان كەيٸن بلوگەر enbek.kz ەلەكتروندى ەڭبەك بيرجاسىنداعى بوس ورىندار تۋرالى مەلٸمەتتەردٸ ۇسىندى:
"مىسالى, قازٸرگٸ نارىقتا 500-600 مىڭ ايلىق ۇسىنىپ, جۇمىسشى تاپپاي وتىرعان سالالار جەتكٸلٸكتٸ. enbek.kz ەلەكتروندى ەڭبەك بيرجاسىندا ايلىعى 980 مىڭعا دەيٸن جەتەتٸن 36 مىڭ بوس جۇمىس ورنى بار ەكەن. سونىڭ 4 مىڭعا جۋىق ۆاكانسيياسىنىڭ ايلىعى 350 مىڭنان باستالادى ەكەن", - دەپ جازدى مەنٸدبەك.
سۇرانىسقا يە جۇمىسشى ماماندىقتار (ۇلتتىق ستاتيستيكا بيۋروسى):
-
اۆتوبۋس جٷرگٸزۋشٸسٸ – 400–600 مىڭ تگ
-
قاپتاۋشى/فاسوۆششيك – 400–650 مىڭ تگ
-
ارنايى تەحنيكا ماشينيستٸ – 400–700 مىڭ تگ
-
تراكتور جٷرگٸزۋشٸسٸ – 350–450 مىڭ تگ
-
دەنەكەرلەۋشٸ – 350 مىڭ تگ-دەن جوعارى
بۇل جۇمىس ورىندارى تەك استانا مەن الماتىدا عانا ەمەس, قوستاناي, قاراعاندى, ماڭعىستاۋ سيياقتى ٶڭٸرلەردە دە 3 مىڭنان استام بوس ورىنعا ماماندار جەتٸسپەيدٸ.
ەربول مەندٸبەكتٸڭ ايتۋىنشا, بۇل ماماندىقتارعا تٶرت جىل وقيتىن جوعارى بٸلٸمنٸڭ قاجەتٸ جوق. ارنايى كۋرستى وقىپ, بٸردەن جۇمىسقا كٸرٸسۋگە بولادى. تٸپتٸ مەملەكەت بۇل كۋرستاردى تەگٸن ۇسىنادى, تەك جۇمىسسىز رەتٸندە تٸركەلۋ جەتكٸلٸكتٸ.
«شەتەلدە تاپقانىڭ سول ەلدەگٸ پەتەراقى مەن تاماققا كەتەدٸ. ال ٶز ايماعىڭدا تەحنيكالىق ماماندىق مەڭگەرٸپ, 500–600 مىڭ تەڭگە تاپساڭ – ەرٸ تابىس, ەرٸ وتباسىڭنىڭ قاسىنداسىڭ. باستىسى – وتانىنداسىڭ», – دەپ تٷيٸندەدٸ بلوگەر.
ەربول مەندٸبەك قازاقستاندىقتاردى جالعان نامىستان ارىلىپ, ەل ٸشٸندە دە لايىقتى جالاقىمەن جۇمىس تابۋعا بولاتىنىن ەسكە سالدى.
