بٷگٸن شايبالى حوككەيدەن 2021 جىلعى ەلەم چەمپيوناتىنىڭ ەليتالىق ديۆيزيونىندا قازاقستان قۇراماسى گەرمانييامەن كەزدەستٸ, دەپ حابارلايدى "ۇلت اقپارات".
ەسكە سالساق, نەمٸس حوككەيشٸلەرٸ بيىلعى تۋرنيردە جاقسى ويىن ٶرنەگٸن كٶرسەتٸپ كەلەدٸ. تۋرنير كەستەسٸندە قاتارىنان ٷش مەرتە جەڭٸسكە جەتٸپ, توعىز ۇپايمەن كٶش باسىندا تۇر.
سوندىقتان قازاقستاندىق حوككەيشٸلەر ٷشٸن بٷگٸنگٸ كەزدەسۋ وڭايعا سوقپايتىنى انىق ەدٸ.
ەسەپتٸ العاشقى بولىپ قازاقستاندىق الەكسەي شين 26-مينۋتتا اشتى. ودان كەيٸن 29-مينۋتتا نەمٸس حوككەيشٸسٸ توم كيۋنحاكل تارازى باسىن تەڭەستٸردٸ.
ال 29-مينۋتتا تاعى بٸر نەمٸس حوككەيشٸسٸ ماركۋس ايزەنشميد مەرگەندٸك تانىتىپ, ٶز قۇراماسىن العا شىعاردى.
ٷشٸنشٸ كەزەڭنٸڭ 41-مينۋتىندا قازاقستاندىق رومان ستارچەنكو قارسىلاستار قاقپاسىنا بەلگٸلەنگەن بۋلليتتەن مٷلت كەتكەن جوق.
ويىننىڭ 55-مينۋتىندا پاۆەل اكولزين قازاقستاندىق قۇرامانى العا شىعاردى. قازاقستاندىق حوككەيشٸلەر قارسىلاسىنان 3:2 ەسەبٸمەن باسىم تٷستٸ.
ەكٸ قۇراما بۇعان دەيٸن اتالعان تۋرنيردە بەس مەرتە كەزدەستٸ. ونىڭ ەكەۋٸندە قازاقستاندىق حوككەيشٸلەر جەڭٸسكە جەتسە, ٷشەۋٸندە نەمٸس قۇراماسىنىڭ مەرەيٸ ٷستەم بولدى.
سوڭعى رەت قازاقستاندىق حوككەيشٸلەر اتالعان قۇرامانى 2005 جىلدىڭ 1 مامىرىندا 2:1 ەسەبٸمەن جەڭگەن بولاتىن.
ەندٸ قازاقستان قۇراماسى 28 مامىردا كانادامەن كەزدەسسە, گەرمانييا 29 مامىردا فينلياندييامەن مۇز ايدىنعا شىعادى.
