سەرٸكزات دٷيسەنعازى ايتىسكەر اقىن ماقسات احانوۆ تۋرالى پٸكٸر بٸلدٸردٸ, دەپ حابارلايدى ult.kz.
بۇل تۋرالى ادىرنا ۇلتتىق پورتالى جازدى. ونىڭ سٶزٸنشە, ول ماقسات احانوۆپەن تەلەفون ارقىلى سٶيلەسكەن. ەڭگٸمە بارىسىندا ايتىسكەردٸڭ ٶز ەرەكەتٸنە ٶكٸنٸپ وتىرعانىن اڭعارعان.
«قاتەلٸكتٸ مويىنداي بٸلۋ دە ەر ازاماتتىڭ بٸر جاقسى قاسيەتٸ عوي. ەيتپەسە, “وندا تۇرعان نە بار?” دەپ قاسارىساتىندار دا تابىلادى», – دەپ جازدى سەرٸكزات دٷيسەنعازى.
اقىن ماقسات احانوۆتى ايتىسقا العاش شىققان كەزٸنەن بٸلەتٸنٸن ايتىپ, ونىڭ بويىنان ايتىسكەرگە تەن كٶپتەگەن قاسيەتتٸڭ تابىلاتىنىن اتاپ ٶتتٸ.
«ٶتە دارىندى, ايتىس اقىنىنا تەن سينكرەتتٸ قاسيەتتٸڭ بارلىعى بٸر بويىنان تابىلاتىن سيرەك تالانت. تالانتىن بىلاي قويعاندا, ازاماتتىعى بيٸك ەكەنٸنە تالاي رەت كۋە بولعانمىن», – دەدٸ ول.
سەرٸكزات دٷيسەنعازىنىڭ پٸكٸرٸنشە, بۇل جولى ماقسات احانوۆتىڭ «سەرٸلٸگٸنە ماستىعى قوسىلىپ», جاعداي باقىلاۋدان شىعىپ كەتكەن.
اقىن وقيعانىڭ جەكە كەسٸپكەردٸڭ تۋعان اۋىلىندا ٶتكەن قىزىقتاما ايتىسى كەزٸندە بولعانىن اتاپ ٶتتٸ. ونىڭ ايتۋىنشا, بۇل ايتىس اقىندارى وداعى ۇيىمداستىرعان رەسمي ايتىس ەمەس.
«جاڭىلمايتىن جاق, سٷرٸنبەيتٸن تۇياق بولمايدى. سەرٸنٸڭ بٸر ەركەلٸگٸنە كەشٸرٸممەن قارايىق, اعايىن», – دەدٸ سەرٸكزات دٷيسەنعازى.
