سەناتتىڭ جالپى وتىرىسىندا دەپۋتات مۇرات باقتييارۇلى ارال تەڭٸزٸنٸڭ سولتٷستٸگٸندەگٸ كٸشٸ ارال باسسەينٸندە سۋ دەڭگەيٸنٸڭ تٶمەندەۋٸنە الاڭداۋشىلىق بٸلدٸردٸ, دەپ حابارلايدى "ۇلت اقپارات".
سەناتوردىڭ ايتۋىنشا, كٸشٸ ارالداعى سۋ كٶلەمٸ قازٸر 22 ملرد تەكشە مەتردٸ قۇرايدى. ول الدىڭعى جىلدارعا قاراعاندا 5 ملرد تەكشە مەترگە ازايعان. كٸشٸ ارالعا قۇياتىن سىردارييا ٶزەنٸنٸڭ سۋىن پايدالانۋدىڭ قازٸرگٸ قارقىنى ساقتالار بولسا, الداعى 5-7 جىلدا تەڭٸزدٸڭ سولتٷستٸگٸ قۇرعاققا اينالىپ, ەكولوگييالىق اپاتقا ۇشىراۋى مٷمكٸن.
وسىعان وراي مۇرات باقتييارۇلى تەڭٸزدٸ ساقتاپ قالۋ ٷشٸن كەشەندٸ شارالار قابىلداۋ قاجەتتٸگٸن ايتتى. سونىڭ اياسىندا سۋ ديپلوماتيياسىن بەلسەندٸ جٷرگٸزۋ, سۋدى تيٸمدٸ پايدالانۋ جەنە تيٸستٸ زاڭدارعا ٶزگەرتۋلەر ەنگٸزۋدٸڭ بەرەرٸ مول ەكەنٸن تٸلگە تيەك ەتتٸ.
«وسىدان 17 جىل بۇرىن قابىلدانعان ەلٸمٸزدەگٸ سۋ رەسۋرستارىن باسقارۋ زاڭى قازٸرگٸ تالاپتارعا جاۋاپ بەرە المايدى. سوندىقتان سۋدى پايدالانۋدىڭ جاڭا تۇجىرىمداماسى جاسالىپ, ول تەك سۋعا قاجەتتٸلٸكتٸ رەتتەپ قويماي, سۋ نىساندارىمەن بايلانىستى تابيعي ەكوجٷيەلەردٸ ساقتاپ, سۋدى ٷنەمدەۋگە ىنتالاندىرۋ ٷشٸن تۇتىنۋ سالاسىنداعى تاريفتەردٸ قايتا قاراپ, وزىق تەحنولوگييالاردى ەنگٸزۋگە مۇرىندىق بولۋعا تيٸس», – دەدٸ مۇرات باقتييارۇلى دەپۋتاتتىق ساۋالىندا.
