سەناتور دانا نۇرجٸگٸت ەيەلدەردٸڭ زەينەتكە شىعۋ جاسىن تٶمەندەتۋدٸ ۇسىندى, - دەپ حابارلايدى Tengrinews.kz.
دانا نۇرجٸگٸت دەپۋتاتتىق ساۋالىندا ەلەۋمەتتٸك جەلٸلەر ارقىلى كٷن سايىن وننان اسا ٶتٸنٸش كەلٸپ تٷسەتٸنٸن ايتتى.
"ەگەر ٶزٸمٸزدٸ تىڭداۋشى مەملەكەتپٸز دەسەك, بۇل مەسەلەنٸ نازاردان تىس قالدىرا المايمىز. 2015 جىلى زەينەتكەرلٸك جاستى ٶزگەرتۋ تۋرالى زاڭ قابىلدانعاندا قازاقستانداعى ورتاشا جاس نەگٸزگە الىنعان بولاتىن. ول كەزدە ول 73 جاس بولاتىن. 2021 جىلى بۇل كٶرسەتكٸش 70 جاس بولىپ قابىلداندى. بۇۇ مەلٸمەتٸنشە, قازاقستاندا 2022 جىلى ٶمٸر سٷرۋ ۇزاقتىعى ەيەلدەر ٷشٸن 78 جاس, ەرلەر ٷشٸن 70 جاس بولادى دەپ بولجانعان. الايدا, پاندەميياعا بايلانىستى بۇل كٶرسەتكٸشتەر ٶزگەردٸ. شىندىعىندا, بٷگٸندە قانداي بولجام بار ەكەنٸ تۋرالى ناقتى اقپارات جوق. مەنٸڭشە, مۇنداي انىق ەمەس, سەنٸمسٸز اقپارات, ياعني كٷمەندٸ كٶرسەتكٸشتەر ەلەۋمەتتٸك ماڭىزى بار زاڭدى قابىلداۋعا نەگٸز بولا المايدى", - دەدٸ دانا نۇرجٸگٸت.
ول ۇلتتىق ستاتيستيكا بيۋروسىنىڭ دەرەكتەرٸنە سٸلتەمە جاساپ, 2020 جىلى ٶلٸم-جٸتٸم 2019 جىلمەن سالىستىرعاندا 22 پايىزعا ٶسكەنٸن ايتتى. ونىڭ ايتۋىنشا, كەيٸنگٸ جىلدارى بۇل پروتسەسس توقتاعان جوق.
"وسىلايشا, ەلەمدٸك بولجامدارعا نەگٸزدەلگەن 2015 جىلعى زەينەتاقى رەفورماسى قازاقستاننىڭ قازٸرگٸ جاعدايىنا مٷلدەم سەيكەس كەلمەيدٸ. وسىدان جەتٸ جىل بۇرىن ەلەمدە قارتتار سانى كٶبەيٸپ, ەڭبەككە جارامدىلار ازايىپ بارا جاتقانى ايتىلدى. الايدا, پاندەمييا, ەلەۋمەتتٸك-ەكونوميكالىق داعدارىس سالدارىنان بۇل بولجامدار قاتە بولىپ شىقتى. تاعى بٸر سەبەپ, مەملەكەتٸمٸزدەگٸ باستى مەسەلە – جۇمىسسىزدىق. ەسٸرەسە, جاستار اراسىنداعى جۇمىسسىزدىق. قازاقستانداعى مٷددەلٸ مەملەكەتتٸك ورگانداردىڭ رەسمي اقپاراتىنا سەيكەس, 2022 جىلدىڭ بٸرٸنشٸ توقسانىنداعى جاعداي بويىنشا ەڭبەككە قابٸلەتتٸ 9 ميلليوننان استام ادامنىڭ 453,1 مىڭعا جۋىعى جۇمىسسىز. 2021 جىلدىڭ بٸرٸنشٸ توقسانىندا بٸر جىلدان استام جۇمىس ٸزدەپ جٷرگەن 15 پەن 28 جاس ارالىعىنداعى جاستاردىڭ ٷلەسٸ 8 350 ادام بولدى. ال 2022 جىلدىڭ بٸرٸنشٸ توقسانىندا بۇل كٶرسەتكٸش 9 262 ادام بولدى نەمەسە 10 پايىزعا ٶستٸ. بۇعان جىل سايىن جوعارى وقۋ ورىندارىن بٸتٸرٸپ, جۇمىس تابا الماي جٷرگەن جاستاردىڭ سانىن قوسساق. سونداي-اق بيىل ەلٸمٸزدە العاش رەت قولدانبالى باكالاۆريات پيلوتتىق رەجيمدە جٷزەگە اسىرىلىپ جاتىر, وعان سەيكەس جاستار 2-2,5 جىل وقىپ, ەڭبەك نارىعىنا جۇمىس ٸزدەپ شىعادى. ولاردى قايدا جۇمىسقا الامىز?", - دەپ قوستى سەناتور.
دەپۋتات قازٸرگٸ زەينەتاقى زاڭناماسىنا سەيكەس ازاماتتار 60-63 جاسقا دەيٸن جۇمىس ٸستەسە, جۇمىس ورىندارىن بوساتپايتىنىن ايتتى. ونىڭ ايتۋىنشا, مۇنداي جاعدايدا ٶسكەلەڭ ۇرپاققا جۇمىس قالمايدى.
"سوڭعى ۋاقىتتا ٷكٸمەت زەينەتاقى سەكتورى مەسەلەلەرٸن قاراستىرىپ, اۋىر جۇمىستاردا ٸستەيتٸن ادامداردىڭ زەينەت جاسىن قايتا قاراپ جاتقانىن بٸلەمٸز. ەيەلدەردٸڭ زەينەت جاسىن ٶزگەرتۋ تۋرالى تٸلەكتەرٸن ايتپاۋعا ارىم جٸبەرمەيدٸ. وسى ٶتٸنٸشتەر بويىنشا ەيەلدەردٸڭ زەينەتكە شىعۋ جاسىن - 58 جاس دەپ بەلگٸلەۋٸڭٸزدٸ سۇرايمىن. ال ەگەر ەيەل جۇمىسىن جالعاستىرۋعا دايىن بولسا, ونى قاراستىرۋ ونىڭ قۇقىعى", - دەپ تٷيٸندەدٸ سٶزٸن دانا نۇرجٸگٸت.
قازٸر قازاقستان زاڭناماسىنا سەيكەس, ەرلەر ٷشٸن زەينەتكەرلٸك جاس - 63 جاس, ەيەلدەر ٷشٸن قازٸرگٸ ۋاقىتتا 60,5 جاستى قۇراپ, 2027 جىلى ودان ەرٸ كەزەڭ-كەزەڭمەن 63 جاسقا دەيٸن ٶسەدٸ.
