سەناتورلار داعدارىسقا قارسى شارالارعا بٶلٸنگەن قاراجاتتىڭ تيٸمدٸ جۇمسالۋىن باقىلاۋ كەرەك. بۇل تۋرالى پارلامەنت سەناتىنىڭ تٶراعاسى داريعا نازارباەۆا مەلٸم ەتتٸ, دەپ حابارلايدى "ۇلت اقپارات".
«ناقتىلانعان بيۋدجەتتٸڭ جاڭا پارامەترلەرٸ پرەزيدەنتتٸڭ جارلىعىمەن بەكٸتٸلٸپ, جارييالاندى. جالپى, ازاماتتار مەن بيزنەستٸ قولداۋعا باعىتتالعان قاراجاتتىڭ كٶلەمٸ 6 تريلليونعا جۋىق تەڭگەنٸ قۇرايدى. بۇل قارجى داعدارىسقا قارسى شارالاردى ٸسكە اسىرۋعا باعىتتالعان, ەكونوميكانى, شاعىن جەنە ورتا بيزنەستٸ, اۋىل شارۋاشىلىعى مەن ازاماتتاردى وسى كٷردەلٸ جاعدايدا قولداۋدى كٶزدەيدٸ. بٸزدٸڭ مٸندەتٸمٸز – داعدارىسقا قارسى شارالارعا بٶلٸنگەن قاراجاتتىڭ جۇمسالۋىن باقىلاۋ جاساۋ, وسى شارالار تۋرالى حالىقتى حاباردار ەتۋ», -دەدٸ د. نازارباەۆا سەناتتىڭ جالپى وتىرىسىندا.
«سوندىقتان سەنات كوميتەتتەرٸنە ٶز باعىتتارى بويىنشا, ٶڭٸرلەردەن سايلانعان دەپۋتاتتارعا – ٶز ٶڭٸرلەرٸ بويىنشا, پرەزيدەنت تاپسىرمالارىنىڭ ورىندالۋىنا تۇراقتى مونيتورينگ جٷرگٸزۋدٸ, ٷكٸمەتتٸڭ داعدارىسقا قارسى شارالارىنىڭ ٸسكە اسىرىلۋىن باقىلاۋعا الۋدى تاپسىرامىن», - دەدٸ سەنات تٶراعاسى.
