مٸنە, شىندىق شىعىپ جاتىر. تاريح بەرٸن ٶز ورنىنا قويادى. مۇنى جەلٸدە پايدا بولعان مارقۇم روزا باعلانوۆانىڭ مىنا ۆيدەوسى تاعى بٸر مەرتە دەلەلدەپ بەردٸ. شٸركٸن, ٶنەر ادامدارىنىڭ ٶزٸ بيٸك بولعان عوي ول كەزدە. ال قازٸرگٸ شوۋ-بيزنەستەگٸلەر ٸشكەن-جەگەنٸن ايتقانىنان اسا الماي جٷر... ٶكٸنٸشتٸ, ەرينە.
ەلەۋمەتتٸك جەلٸدە پايدا بولعان بۇل ۆيدەونى بۇرىن كٶرگەن ەمەسپٸز. سوعان قاراعاندا, ول وسى كٷنگە دەيٸن قۇپييا قۇجاتتاردىڭ ٸشٸندە شاڭ بوپ, بٶگٸپ جاتقان سەكٸلدٸ. ۆيدەودا جەزتاڭداي ەنشٸ, قازاقتىڭ بۇلبۇلى — روزا باعلانوۆا مٸنبەردە سٶيلەپ تۇر.
زالدا تاناداي تىنىشتىق. ٶيتكەنٸ ايتىلماۋى تيٸس سٶز ايتىلىپ جاتىر. قازاقتار تۋرالى. ناقتىراق ايتقاندا, قازاق نەۋبەتٸ. قازاققا قىلعان قىزىل يمپەرييانىڭ لاڭى تۋرالى...
"مەن سوعىستى كٶردٸم. بٸراق ارالدا بوپ جاتقان نەرسەنٸ بٸر سٶزبەن توقتاتۋ مٷمكٸن ەمەس. يە, سوعىستى توقتاتۋعا بولادى. اتوم بومباسىن دا, ۇشاقتى دا توقتاتۋعا بولادى. بٸراق مۇنى توقتاتۋ مٷمكٸن ەمەس. بٸز وسىندا وتىرمىز عوي, قازٸر سٶز سٶيلەپ, ال انا جاقتا تابيعات ٶز دەگەنٸن جاساپ جاتىر. تىرناقشاعا الىپ ايتايىنشى, „ۇلى عالىمدارىمىزدىڭ„ قولىمەن جاسالعان نەرسەنٸ ايتام.
بٷكٸل بٸر ۇلتتى جاتىرىندا قىرىپ جاتقان عالىمداردى مەن كٶككە كٶتەرٸپ, ۇلىقتاپ قالاي باسقالاي ايتام. بٸر ۇلتتىڭ كٶزٸن جويىپ جاتىر دەيمٸن.
باسقا كەزدە بٸز مۇنى قاسكٶيلٸك دەر ەدٸك. ال ولار كسرو-نىڭ اكادەميكتەرٸ, ەكٸ-ٷش دٷركٸن سوۆەت وداعىنىڭ باتىرى عوي. مۇندايدا نە دەيمٸز?..
قازاقستان تەرريتوريياسىندا نە بوپ جاتقانىن بٸلەسٸزدەر مە?
سەمەيدە پوليگون, بايقوڭىردا كوسمودروم, ارالدا… وسىدان سوڭ, قازاقتارعا قالاي ٶمٸر سٷرۋگە بولادى? ەگەر تۋرا وسى جاعداي شەتەلدە بولعاندا, مىسالى, امەريكادا بولسىنشى, وندا قالاي ايقايلاپ-قيقۋلاپ شىعار ەدٸك.
وڭباعاندار, بەتٸ شٸمٸرٸكپەي, بٷتٸن بٸر ۇلتتى جويىپ جاتىر دەر ەدٸك. بۇل ارادا تەك جالعىز قازاقستان ەمەس قوي. ولاردا دا بولدىم. ماعان ٶتە اۋىر بولدى. كٶزٸ جوق تۋعانىنان. قوس كٶزٸ دە. سولاي تۋادى. باسىندا شاشى جوق. قولى جوق. اياعى جوق. بۇل نەنٸ بٸلدٸرەدٸ? كٸمنەن سۇراۋىمىز كەرەك, بۇل تراگەدييانى كٸمگە ايتۋىمىز كەرەك.
بٷتٸن ۇلتتىڭ وسى جان جاراسىن, باسىنداعى تراگەديياسىن جەتكٸزۋ ٷشٸن, قاي ينستانتسيياعا دەيٸن بارۋىمىز كەرەك?..", - دەپ, روزا اپايىمىز كٶزٸنە جاس الىپ, ەبدەن تىعىرىققا تٸرەلٸپ تۇر.
