رەسەيدٸڭ ٸشكٸ ٸستەر مينيسترلٸگٸ "روسبالت" اقپارات اگەنتتٸگٸنٸڭ تٸلشٸسٸ الەكساندر شۆارەۆكە "جالا جابۋ" جەنە "اقشا بوپسالاۋ" باپتارى بويىنشا سىرتتاي ايىپ تاقتى دەپ حابارلادى جۋرناليستٸڭ ادۆوكاتىنا سٷيەنگەن رەسەيدٸڭ اقپارات قۇرالدارى.
تەرگەۋ ورگاندارىنىڭ دەرەگٸنشە, جۋرناليست قازاق كەسٸپكەرٸ كەڭەس راقىشەۆتەن 50 مىڭ دوللار كٶلەمٸندە اقشا بوپسالاعان. تەرگەۋشٸلەر جۋرناليستٸڭ كەسٸپكەردەن بەلگٸلٸ بٸر سايتتا جارييالانعان "جالعان اقپاراتتى جويۋ ٷشٸن اقشا تالاپ ەتكەنٸن" ايتادى. شۆارەۆ سونىمەن بٸرگە ميللياردەر ەلٸشەر ۋسمانوۆ تۋرالى "قاساقانا جالعان اقپارات تاراتتى" دەپ ايىپتالىپ وتىر.
"بۇلىڭعىر, ويدان شىعارىلعان, نەگٸزسٸز ايىپتار" دەدٸ شۆارەۆتٸڭ ادۆوكاتى ۆلاديمير جەرەبەنكوۆ. ادۆوكاتتىڭ ايتۋىنشا, جۋرناليست قازٸر لاتۆييادا ەمدەلٸپ جٷر.
مەسكەۋدٸڭ تۆەر سوتى 11 قاراشادا شۆارەۆتٸ سىرتتاي سوتتاۋ تۋرالى ٶتٸنٸشتٸ قارايدى. جۋرناليسكە حالىقارالىق ٸزدەۋ جارييالانعان.
شۆارەۆ تاسس اگەنتتٸگٸنە بەرگەن سۇحباتىندا قىلمىستىق ٸستٸ 2015 جىلى مەسكەۋدە بولعان اتىس تۋرالى ماقالامەن بايلانىستىرعان. سول ماقالا جارىق كٶرگەننەن كەيٸن تەرگەۋ كوميتەتٸنٸڭ بٸرقاتار جوعارى لاۋازىمدى شەنەۋنٸكتەرٸ, قىلمىستىق توپ جەتەكشٸسٸ رەتٸندە سانالاتىن زاحاريي كالاشوۆقا ٷكٸم شىققان.
"ەحو موسكۆى" سايتىنىڭ جازۋىنشا, پوليتسييا جۋرناليستٸڭ ٷيٸ مەن جۇمىس ورنىن تٸنتٸپ, كالاشوۆ ٸسٸنە قاتىستى دەرەكتەر بار كومپيۋتەردٸ تەركٸلەگەن.
