Reseidiń ishki ister ministrligi "Rosbalt" aqparat agenttiginiń tilshisi Aleksandr Shvarevke "jala jabý" jáne "aqsha bopsalaý" baptary boiynsha syrttai aiyp taqty dep habarlady jýrnalistiń advokatyna súiengen Reseidiń aqparat quraldary.
Tergeý organdarynyń dereginshe, jýrnalist qazaq kásipkeri Keńes Raqyshevten 50 myń dollar kóleminde aqsha bopsalaǵan. Tergeýshiler jýrnalistiń kásipkerden belgili bir saitta jariialanǵan "jalǵan aqparatty joiý úshin aqsha talap etkenin" aitady. Shvarev sonymen birge milliarder Álisher Ýsmanov týraly "qasaqana jalǵan aqparat taratty" dep aiyptalyp otyr.
"Bulyńǵyr, oidan shyǵarylǵan, negizsiz aiyptar" dedi Shvarevtiń advokaty Vladimir Jerebenkov. Advokattyń aitýynsha, jýrnalist qazir Latviiada emdelip júr.
Máskeýdiń Tver soty 11 qarashada Shvarevti syrttai sottaý týraly ótinishti qaraidy. Jýrnaliske halyqaralyq izdeý jariialanǵan.
Shvarev TASS agenttigine bergen suhbatynda qylmystyq isti 2015 jyly Máskeýde bolǵan atys týraly maqalamen bailanystyrǵan. Sol maqala jaryq kórgennen keiin tergeý komitetiniń birqatar joǵary laýazymdy sheneýnikteri, qylmystyq top jetekshisi retinde sanalatyn Zaharii Kalashovqa úkim shyqqan.
"Eho Moskvy" saitynyń jazýynsha, politsiia jýrnalistiń úii men jumys ornyn tintip, Kalashov isine qatysty derekter bar kompiýterdi tárkilegen.
