اقش قارجى مينيسترٸ دجانەت يەللەن "امەريكانىڭ رەسەيگە سالعان سانكتسييالارىنىڭ كەيبٸرٸ ۋكرايناداعى سوعىس اياقتالعان سوڭ دا كٷشٸندە قالا بەرەدٸ" دەدٸ. بۇل جٶنٸندە ول جەكسەنبٸدە The Wall Street Journal باسىلىمىنا بەرگەن سۇحباتىندا ايتتى.
يەللەننٸڭ سٶزٸنە قاراعاندا, ەگەر ۋكراينا مەن رەسەي اراسىندا بەيبٸت كەلٸسٸم جاسالسا, اقش وداقتاستارىمەن بٸرگە رەسەيگە سالىنعان سانكتسييا شارالارىن ساراپتاپ شىعادى. كەيبٸر سانكتسييالار ٶزگەرۋٸ مٷمكٸن, بٸراق بولعان جايتتى ەسكەرە وتىرىپ, كەيبٸر سانكتسييالار كٷشٸندە قالدىرىلادى.
يندونەزييادا ٶتەتٸن G-20 سامميتٸنە بارعان يەللەن "شىن مەنٸندە, رەسەي تاراپىنان ۋكرايناعا دا ىڭعايلى بولاتىنداي كەلٸسسٶز ٶتكٸزۋگە ەشبٸر تالپىنىس بولماعانىن, سوندىقتان بەيبٸت كەلٸسسٶز تۋرالى سٶز ەتۋگە ەلٸ ەرتە دەپ سانايتىنىن" ايتتى.
اقش, ەۋروپا وداعى, ۇلىبريتانييا مەن ٶزگە دە كٶپتەگەن ەلدەر 2014 جىلى مەسكەۋ قىرىمدى اننەكسييالاپ العاننان باستاپ رەسەيگە دٷركٸن-دٷركٸن سانكتسييا سالىپ كەلگەن. 2022 جىلدىڭ اقپانىندا ۋكرايناعا شابۋىل جاساعان سوڭ سانكتسييانى قاتايتا تٷسكەن. قازٸر ەۋروپا وداعى رەسەيگە سانكتسييانىڭ 8 پاكەتٸن سالىپ وتىر.
ۋكراينا قارۋلى كٷشتەرٸنٸڭ كەيٸنگٸ اپتالارداعى جەتٸستٸگٸ رەسەيمەن كەلٸسسٶز باستالۋى مٷمكٸن دەيتٸن سٶزدٸ كٶبەيتكەن. ۆاشينگتون بەيبٸت كەلٸسسٶز تۋرالى شەشٸمدٸ كيەۆ قابىلدايدى دەپ سانايدى. ۋكراينا "كەلٸسسٶزگە قارسى ەمەسپٸز, ول ٷشٸن رەسەي ەسكەرٸ ۋكراينا اۋماعىنان, سونىڭ ٸشٸندە قىرىمنان دا كەتۋگە تيٸس" دەگەن شارت قويىپ وتىر.
