18 قاڭتاردا رەسەي سوتى فەدەرالدى قىزمەتتٸڭ سۇراۋى بويىنشا وپپوزيتسييالىق ساياساتكەر الەكسەي ناۆالنىيدى 30 كٷنگە قاماۋعا الدى. بۇل تۋرالى ونىڭ ادۆوكاتى ۆاديم كوبزەۆ حابارلادى.
ناۆالنىي 17 قاڭتاردا گەرمانييادان رەسەيگە ورالعان ەدٸ. پوليتسييا ونى مەسكەۋدەگٸ شەرەمەتەۆو ەۋەجايىنان الىپ كەتكەن.
سوت ناۆالنىي جەتكٸزٸلگەن حيمكيدەگٸ ٸشكٸ ٸستەر ورگانىنىڭ عيماراتىندا ٶتتٸ. سوت جايلى ناۆالنىي مەن ادۆوكاتىنا الدىن الا حابارلانباعان. ادۆوكاتتارىن سوتقا عانا جٸبەردٸ.
ٸشكٸ ٸستەر مينيسترلٸگٸنٸڭ مەسكەۋ وبلىسى بويىنشا باسقارماسى سوتتىڭ ٸشكٸ ٸستەر ورگانى عيماراتىندا ٶتۋٸن ناۆالنىيدىڭ كوروناۆيرۋس تەستٸنٸڭ نەتيجەسٸ جوقتىعىمەن بايلانىستىردى. قازٸرگٸ ەرەجە بويىنشا, رەسەيگە شەتەلدەن كەلگەندەر 72 ساعاتتان تەست تاپسىرۋى تيٸس.
سوت ٶتكەن ورگان عيماراتى الدىنا ناۆالنىيدىڭ جٷزدەگەن جاقتاسى جينالدى. سوت اشىق ٶتسە دە, جۋرناليستەردٸ كٸرگٸزبەدٸ. زالعا تەك Life پەن "روسسييا" ارناسىنىڭ تٷسٸرۋ توبى كٸردٸ.
ناۆالنىي بۇل ەرەكەتتٸ "باسسىزدىق" دەپ مەلٸمدەدٸ.
- ناۆالنىي كەشە, 17 قاڭتاردا گەرمانييادان مەسكەۋگە ۇشىپ كەلگەن. ول تامىزدان بەرٸ بەرليندە ەمدەلگەن. رەسەي بيلٸگٸ 29 جەلتوقساندا ناۆالنىيگە پوليتسيياعا كەلٸپ بەلگٸلەنبەدٸ دەپ ٸزدەۋ جارييالاعان. ناۆالنىيدىڭ شارتتى جازا بويىنشا سىناق مەرزٸمٸ 30 جەلتوقساندا بٸتكەن. وپپوزيتسيونەر بۇرىن رەسەيدە بٸرنەشە رەت شارتتى جازاعا كەسٸلگەن.
- باتىس باسشىلارى مەن قۇقىق قورعاۋشىلار ناۆالنىيدىڭ ۇستالۋىن سىنادى. "مەموريال" قۇقىق قورعاۋ ورتالىعى مەن Amnesty International ونى "ساياسي تۇتقىن" دەپ تانىعان. ناۆالنىيدىڭ ٶزٸ قۋدالانۋىنىڭ ساياسي استارى بار دەيدٸ.
- ناۆالنىي 20 تامىزدا ۋلانىپ, كوماعا تٷسكەن. ول گەرمانيياعا جەتكٸزٸلٸپ, سول جاقتا ەمدەلگەن. ناۆالنىي ۇستالاتىنىن بٸلە تۇرا مەسكەۋگە ورالدى. ناۆالنىي ۋلانۋىنا رەسەي بيلٸگٸنٸڭ قاتىسى بار دەپ سانايدى.
- 17 قاڭتاردا ناۆالنىي مٸنگەن ۇشاق مەسكەۋدەگٸ ۆنۋكوۆو ەۋەجايىنا قونۋى تيٸس ەدٸ. بٸراق ۇشاق شەرەمەتەۆو ەۋەجايىنا قوندى. سول جەردە پوليتسييا ونى ۇستاپ ەكەتتٸ.
