قىزىلوردا وبلىسىنىڭ ارال اۋدانىندا ەكەسٸمەن جانجالداسقان ۇل قازا تاپتى. ادام ٶلٸمٸنە ەكەپ سوققان وتباسىلىق جانجال بيىل 4 شٸلدەدە بولعان, دەپ حابارلايدى ult.kz.
وبلىستىق پروكۋراتۋرانىڭ مەلٸمەتٸنشە, وقيعا كەزٸندە ەكەسٸ مەن ۇلى ٶز ٷيٸندە سٶزگە كەلٸپ قالعان. جانجال بارىسىندا ەكەسٸ ۇلىنا پىشاق جاراقاتىن سالىپ, ونىڭ جٷرەك تامىرىن زاقىمداعان. العان جاراقاتىنان جەبٸرلەنۋشٸ وقيعا ورنىندا كٶز جۇمعان.
اتالعان دەرەك بويىنشا قىزىلوردا وبلىسىنىڭ قىلمىستىق ٸستەر جٶنٸندەگٸ مامانداندىرىلعان اۋدانارالىق سوتى ٸستٸ قاراپ, ەر ادامدى قر قىلمىستىق كودەكسٸنٸڭ 99-بابىنىڭ 1-بٶلٸگٸ بويىنشا كٸنەلٸ دەپ تانىدى. سوت ٷكٸمٸمەن وعان 8 جىل مەرزٸمگە باس بوستاندىعىنان ايىرۋ جازاسى تاعايىندالدى.
ەزٸرگە سوت ٷكٸمٸ زاڭدى كٷشٸنە ەنگەن جوق.
پروكۋراتۋرا تۇرعىنداردى وتباسىلىق جانجال مەن زورلىق-زومبىلىق فاكتٸلەرٸنە بەيجاي قاراماۋعا شاقىردى. مۇنداي جاعدايلارعا كۋە بولعان جاعدايدا قۇقىق قورعاۋ ورگاندارىنا دەر كەزٸندە حابارلاۋ قاجەتتٸگٸن ەسكەرتتٸ.
