قازاقستان رەسپۋبليكاسى مەدەنيەت جەنە اقپارات مينيسترلٸگٸ «قالا حيكايالارى» اتتى جاڭا رەسپۋبليكالىق ەدەبي بايقاۋ باستالعانىن جارييالادى, دەپ حابارلايدى ult.kz.
پروزا جانرىنا ارنالعان بايقاۋدىڭ ماقساتى – قازٸرگٸ قازاقستان قالالارىنىڭ تىنىس-تٸرشٸلٸگٸن كٶركەم شىعارمالار ارقىلى بەينەلەيتٸن جاڭا اۆتورلاردى انىقتاپ, قولداۋ كٶرسەتۋ. قاتىسۋشىلارعا قالا مەدەنيەتٸ, ادام تاعدىرى, قوعامداعى ٶزگەرٸستەر, ۇلتتىق بولمىس پەن زاماناۋي قۇندىلىقتاردىڭ ساباقتاستىعى تاقىرىپتارىن قامتيتىن تۋىندىلار ۇسىنۋ ۇسىنىلادى.
بايقاۋعا قازاقستان ازاماتتارى قاتىسا الادى. ۇيىمداستىرۋشىلار بۇرىن ەش جەردە جارييالانباعان, قالا تاقىرىبىنا ارنالعان رومانداردى قابىلدايدى. شىعارمانىڭ كٶلەمٸ كەمٸندە 10 اۆتورلىق باسپا تاباق بولۋى تيٸس. ەر اۆتور بايقاۋعا بٸر عانا تۋىندى ۇسىنا الادى.
جەڭٸمپازداردى بەلگٸلٸ جازۋشىلار مەن قوعام قايراتكەرلەرٸنەن قۇرالعان قازىلار القاسى انىقتايدى. قورىتىندى شەشٸم اشىق داۋىس بەرۋ ارقىلى قابىلدانادى.
بايقاۋ نەتيجەسٸندە ٷزدٸك شىعارمالار اۆتورلارى ديپلومدارمەن جەنە قوماقتى اقشالاي سىيلىقتارمەن ماراپاتتالادى. سونىمەن قاتار جٷلدەلٸ ورىن العان روماندار 15 مىڭ دانامەن باسىلىپ, ەلٸمٸزدٸڭ كٸتاپحانالارىنا تاراتىلماق.
بايقاۋدىڭ جٷلدە قورى بويىنشا:
- باس جٷلدە – 100 مىڭ اقش دوللارى;
- I ورىن – 75 مىڭ اقش دوللارى;
- II ورىن – 50 مىڭ اقش دوللارى;
- III ورىن – 30 مىڭ اقش دوللارى.
شىعارمالاردى قابىلداۋ 2026 جىلدىڭ قىركٷيەك-جەلتوقسان ايلارى ارالىعىندا جٷرگٸزٸلەدٸ.
مينيسترلٸكتٸڭ مەلٸمەتٸنشە, بايقاۋ قازٸرگٸ قازاقستاندىق ەدەبيەتكە جاڭا سەرپٸن بەرٸپ, ەل قالالارىنىڭ زاماناۋي كەلبەتٸن كٶركەم ەدەبيەت ارقىلى ناسيحاتتاۋعا باعىتتالعان.
