رەسەي پرەزيدەنتٸ ۆلاديمير پۋتيننٸڭ قازاقستانعا ساپارى پىسىقتالىپ جاتىر, دەپ حابارلادى قازاقستاننىڭ سىرتقى ٸستەر مينيسترٸنٸڭ ورىنباسارى رومان ۆاسيلەنكو.
"ۆلاديمير پۋتيننٸڭ قازاقستانعا ساپارى پىسىقتالىپ جاتىر. ول تاراپتار كەلٸسكەن ۋاقىتتا كەلەدٸ", - دەدٸ رومان ۆاسيلەنكو.
ونىڭ ايتۋىنشا, بۇعان قوسا رەسپۋبليكا باسشىسى قاسىم-جومارت توقاەۆتىڭ رەسەيدٸڭ ومبى قالاسىنا ساپارى جوسپارلانىپ وتىر. پرەزيدەنت XVI قازاقستان مەن رەسەيدٸڭ ٶڭٸرارالىق ىنتىماقتاستىعى فورۋمىنا قاتىسادى, دەپ حابارلايدى ريا نوۆوستي.
"ەرينە, ٶڭٸرارالىق ىنتىماقتاستىق فورۋمى ەكٸ مەملەكەت باسشىسىنىڭ تٶراعالىعىمەن ٶتەدٸ. قازاقستان پرەزيدەنتٸ قاسىم-جومارت توقاەۆ بٸرلەسكەن فورۋمعا ۆلاديمير پۋتينمەن بٸرگە قاتىسۋى تيٸس", - دەدٸ ول.
سونداي-اق, ۆاسيلەنكونىڭ ايتۋىنشا, توقاەۆ سوچيدە ٶتەتٸن "ۆالداي" حالىقارالىق پٸكٸرسايىس كلۋبىنىڭ فورۋمىنا قاتىسۋى مٷمكٸن. بۇل شەشٸم كەيٸنٸرەك جارييالانادى.
مەملەكەت باسشىلارى قاتىساتىن XVI قازاقستان مەن رەسەيدٸڭ ٶڭٸرارالىق ىنتىماقتاستىعى فورۋمى 2019 جىلدىڭ 7 قاراشاسىندا ومبى قالاسىندا ٶتەدٸ دەپ جوسپارلانىپ وتىر.
ەسكە سالا كەتسەك, ەكٸ ەلدٸڭ XV ٶڭٸرارالىق ىنتىماقتاستىعى فورۋمى 2018 جىلدىڭ قاراشاسىندا پەتروپاۆل قالاسىندا ٶتتٸ. وعان رەسەي باسشىسى ۆلاديمير پۋتين پەن قازاقستاننىڭ تۇڭعىش پرەزيدەنتٸ نۇرسۇلتان نازارباەۆ قاتىستى.
