قازاقستان پرەزيدەنتٸ قاسىم-جومارت توقاەۆ informburo.kz اقپاراتتىق-ساراپتامالىق پورتالىنا بەرگەن ەكسكليۋزيۆتٸ سۇحباتىندا بەلسەندٸ دۋلات اعادٸلدٸڭ ٶلٸمٸنە قاتىستى پٸكٸر بٸلدٸردٸ, دەپ حابارلايدى "ۇلت اقپارات".
«قوعامدىق ٷلكەن رەزونانسقا بايلانىستى بۇل ٸسپەن تىڭعىلىقتى تانىسىپ شىقتىم. ٶكٸنٸشكە وراي, بەلسەندٸ اعادٸل جٷرەك جەتٸسپەۋشٸلٸگٸ سالدارىنان قازا تاپقاندىعىن نىق سەنٸممەن قۋاتتاي الامىن. كەرٸ سەندٸرۋگە تىرىسۋ – دەمەك شىندىققا قارسى شىعۋ. قازا تاپقان ازامات كٸم بولسا دا, قانداي كٶزقاراستى ۇستانسا دا, ول - ەڭ الدىمەن ادام. ادام ٶمٸرٸ بٸرەگەي ەرٸ باعا جەتپەس قۇندىلىق. بەرٸمٸز دە اللا تاعالانىڭ جازمىشىنا مويىنسۇنامىز. يماندى بولسىن», – دەدٸ قر پرەزيدەنتٸ.
ايتا كەتەيٸك, 25 اقپاندا ٸشكٸ ٸستەر ورگاندارى نۇر-سۇلتانداعى تەرگەۋ يزولياتورىندا قوعام بەلسەندٸسٸ دۋلات اعادٸلدٸڭ قايتىس بولعانىن حابارلادى. وقيعا ورنىنا جەتكەن جەدەل جەردەم بريگادا قىزمەتكەرلەرٸ ەر ادامنىڭ ٶلٸمٸن راستادى.
اعادٸل قاڭتار ايىندا سىرتتاي ايىپتى دەپ تانىلىپ, وعان قاتىستى ەشقايدا كەتپەۋ تۋرالى بۇلتارتپاۋ شاراسى قولدانىلعان ەدٸ. مۇنى ورىنداماعانى ٷشٸن سوت قوعام بەلسەندٸسٸنە قاتىستى شارانى قاماۋعا الماستىردى.
24 اقپان كٷنٸ كەشكە اعادٸل ٷيٸنەن تەرگەۋ اباقتىسىنا جەتكٸزٸلدٸ. وعان قاتىستى قىلمىستىق زاڭبۇزۋشىلىق جاساپ, سۋديا مەن سوت وتىرىسىنا قاتىسۋشىلارعا تٸل تيگٸزگەنٸ ٷشٸن قىلمىستىق ٸس قوزعالعان بولاتىن.
