بٷگٸن ٷكٸمەتتٸڭ كەڭەيتٸلگەن وتىرىسىندا پرەزيدەنت نۇرسۇلتان نازارباەۆ ەلوردا ماڭىندا شۇجىق شىعاراتىن زاماناۋي زاۋىت سالۋدى تاپسىردى, دەپ حابارلايدى قازاقپارات.
«استانانىڭ تٶڭٸرەگٸندە شۇجىق شىعاراتىن سۋپەرزاۋىت سالىڭىزدار. بۇعان دەيٸن وسىنداي تاپسىرما بەرٸلگەن بولاتىن», - دەدٸ پرەزيدەنت.
ٶز كەزەگٸندە پرەمەر-مينيستردٸڭ ورىنباسارى - اۋىل شارۋاشىلىعى مينيسترٸ ٶمٸرزاق شٶكەەۆ بۇل زاۋىت بيىل سالىناتىنىنا ۋەدە بەردٸ.
بۇدان بٶلەك, مەملەكەت باسشىسى يمپورتتالاتىن ازىق-تٷلٸك ٶنٸمدەرٸنە قاتىستى سىن ايتتى.
«بٸزدە ازىق-تٷلٸك ٶنٸمٸنٸڭ يمپورتى ەل ٸشٸندە باعانىڭ ٶسۋٸنە ىقپال ەتەدٸ. بٸز اۋىل شارۋاشىلىعى ٶنٸمدەرٸنٸڭ بارلىق تٷرٸن ٶندٸرەمٸز. ٸشكٸ سۇرانىستى قامتاماسىز ەتۋ ٷشٸن ەربٸر تاۋار بويىنشا ەگجەي-تەگجەيلٸ جۇمىستار جٷرگٸزۋ كەرەك. ٶڭدەلگەن ەتتٸ سىرتتان تاسىمالداۋ دەگەن نە? سٷتتٸ بەلارۋس ەلٸنەن جەتكٸزٸپ جاتىر. بٸزدە جوق ٶنٸمدەر تاسىمالدانسا بولادى, ال ەلدە بار ٶنٸمدەر نەگە قاجەتتٸ دەڭگەيدە شىعارىلمايدى», - دەدٸ نۇرسۇلتان نازارباەۆ.
