بەلارۋس سپورتشى كريستينا تيمانوۆسكاياعا بوسقىن مەرتەبەسٸن ۇسىنعان ۆارشاۆانى "جازالاۋ ٷشٸن" شەكارا ارقىلى ميگرانتتاردى ٶتكٸزٸپ جاتىر. 5 تامىزدا پولشا بيلٸگٸ وسىلاي دەپ مەلٸمدەدٸ, دەپ جازادى ازاتتىق.
بۇعان دەيٸن پولشا بەلارۋس بيلٸگٸنٸڭ قىسىمىنا شاعىمدانعان بەلورۋس سپورتشىسى كريستينا تيمانوۆسكاياعا پولشادان ساياسي باسپانا ۇسىنعان. وسى اپتا ورتاسىندا تيمانوۆسكايا پولياك ديپلوماتتارىنىڭ كٶمەگٸمەن توكيودان ۆارشاۆاعا ۇشىپ كەلدٸ.
پولشانىڭ ٸشكٸ ٸستەر ۆيتسە-مينيسترٸ ماتسەي ۆانسيك 5 تامىزدا مينسك "ەۋرووداقپەن گيبريدتٸك سوعىستا زاڭسىز ميگرانتتاردى قۇرال رەتٸندە پايدالانىپ وتىر" دەپ مەلٸمدەدٸ.
"جاس جٸگٸتتەر مەن ەيەلدەر, بالالار دا بار. بەلارۋس ميگرانتتاردى تٸرٸ قارۋ رەتٸندە قولدانىپ وتىر" دەدٸ ۆانسيك جەرگٸلٸكتٸ Telewizja w Polsce تەلەارناسىنا بەرگەن سۇحباتىندا.
"كەيٸنگٸ كٷندەرٸ ميگرانتتار تولقىنى ارتتى, بٸز ونى بەلورۋس سپورتشىسىنا ساياسي باسپانا ۇسىنعاندىعىمىزعا رەاكتسييا رەتٸندە قابىلدادىق" دەدٸ ول.
بەلورۋس ٷكٸمەتٸ ەزٸرگە وقيعاعا تٷسٸنٸكتەمە بەرگەن جوق.
ەۋروداق الەكساندر لۋكاشەنكو رەجيمٸن ميگرانتتاردى ەو سانكتسيياسىنا تٶتەپ بەرۋ ٷشٸن پايدالانىپ وتىر دەپ ايىپتاپ كەلەدٸ. تيمانوۆسكايانىڭ پولشاعا كەلۋٸ مينسكٸمەن اراداعى جاعدايدى ودان سايىن ۋشىقتىرىپ جٸبەرگەن.
ەۋرووداق 5 تامىزدا ميگرانتتار مەسەلەسٸنە بايلانىستى بەلارۋستەگٸ ەلشٸسٸن قايتاردى.
