دەليدە (ٷندٸستان) كٷرەس تٷرلەرٸنەن ٶتٸپ جاتقان ازييا چەمپيوناتىندا ٶزبەكستاندا تۇراتىن ەتنيكالىق قازاق بالۋانى ەلمۇرات تاسمۇراتوۆ بەسٸنشٸ مەرتە ازييا چەمپيونى اتاندى, دەپ حابارلايدى "ۇلت اقپارات".
Olamsport.com حابارلاۋىنشا, اتالعان «سارىقۇرلىق» دوداسىندا گرەك-ريم كٷرەسٸنەن 63 كەلٸ سالماقتا سىنعا تٷسكەن قانداسىمىز فينالدا وڭتٷستٸك كورەيا ٶكٸلٸ دجينسەي سونگتى 9:0 ەسەبٸمەن جەڭٸپ, ازييا چەمپيونى اتاندى. ول وسىعان دەيٸن تٶرت رەت ازييا بٸرٸنشٸلٸگٸن باعىندىرعان بولاتىن. مٸنە, دەليدە تاعى دا قارسىلاس شاق كەلتٸرمەي, بەسٸنشٸ مەرتە ازييا چەمپيونى اتاندى.
ول ٶزبەكستاننىڭ بوستاندىق اۋدانى قىزىل تۋ اۋىلىندا دٷنيەگە كەلگەن. 1991 جىلى تۋعان ەلمۇرات 13 جاسىندا ەلگە ورالىپ, بەكزات ساتتارحانوۆ اتىنداعى مەكتەپ-ينتەرناتتا بٸلٸم الادى. كٷرەسكە يكەمٸ بولعانىمەن, قۇراما باپكەرلەرٸ تٷرلٸ سىلتاۋلارمەن ونى شاقىرمايدى. ۇلتتىق قۇرامانىڭ ساپىنا ٸلٸنە الماعان ەلمۇرات كەيٸن ٶزبەكستانعا قايتا كٶشٸپ كەتكەن.
ايتا كەتەيٸك, دەليدە ٶتٸپ جاتقان ازييا بٸرٸنشٸلٸگٸندە گرەك-ريم كٷرەسٸنەن قازاقستان بالۋاندارى ەزٸرگە 4 مەدال جەڭٸپ الدى. ونىڭ بٸرەۋٸ - التىن, ٷشەۋٸ - قولا مەدال.
