ورالدىق كەسٸپكەر الەك كۋبەەۆ قالاعا قاراستى كرۋگلووزەرنىي كەنتٸندە تۇراتىن گٷلدارييا ايمۇقاشەۆاعا پەتەر كٸلتٸن تابىس ەتتٸ, دەپ حابارلايدى "ۇلت اقپارات".
بۇل التى بالانى تەربيەلەپ وتىرعان جالعىز باستى انا ٷشٸن توسىن سىي بولدى.
«ورالزەمترۋبسەرۆيس» جشس (ديرەكتورى الەك كۋبەەۆ) كرۋگلووزەرنىي كەنتٸندە ٷش قاباتتى 40 پەتەرلٸك تۇرعىن ٷيدٸ سالىپ بٸتٸرگەن بولاتىن. مٸنە, وسى ٷيدەن ەكٸ بٶلمەلٸ پەتەر گ.ايمۇقاشەۆاعا بەرٸلدٸ.
قۇرىلىسى 1,5 جىلعا سوزىلعان, كٸرپٸشتەن سالىنعان ٷي اۆتونومدى جىلىتىلادى. پەتەرلەرٸ كەڭ دە جارىق.
«بٸز كٶپ بالالى انالاردىڭ بٸرٸنە جٷرەك قالاۋىمىزبەن وسىنداي سىي جاساۋدى ۇيعاردىق. كەنت ەكٸمدٸگٸ التى وتباسىنىڭ تٸزٸمٸن بەردٸ. سولاردىڭ ٸشٸندە ٶزٸ جەتٸمدەر ٷيٸندە ٶسكەن التى بالانىڭ اناسىنا تاڭداۋ تٷستٸ», دەيدٸ الەك تىنىمگەرەيۇلى.
ورال قالالىق مەسليحاتىنىڭ حاتشىسى اققالي ەۋبەكەروۆتٸڭ ايتۋىنشا, بٷگٸندە كەنت حالقى كٶبەيٸپ, تۇرعىن ٷيلەر سالىنۋدا. الداعى ۋاقىتتا اتالعان قۇرىلىس كومپانيياسىنىڭ باستاماسىمەن بالاباقشا قۇرىلىسى دا باستالماقشى.
جاڭا پەتەرگە يە بولعان گٷلدارييا تٶلەگەنقىزى كەسٸپكەرگە ريزاشىلىعىن بٸلدٸردٸ.
«بالا كٷتٸمٸمەن وتىرعاندىقتان, ٶزٸم جۇمىسسىزبىن. قايىرىمدى جانداردىڭ بارشاسىنا العىسىمدى ايتامىن», دەدٸ ول.
كرۋگلووزەرنىي اۋىلدىق وكرۋگٸ ەكٸمٸنٸڭ ورىنباسارى تاتيانا سۋمكينانىڭ سٶزٸنە قاراعاندا, ا.كۋبەەۆ كارانتين ۋاقىتىندا مۇقتاج وتباسىلارعا, مٷگەدەك جاندارعا قولۇشىن سوزىپ كەلەدٸ.
