باتىس قازاقستان وبلىستىق سوتىنىڭ اپەللياتسييالىق القاسى بۇرىنعى ەيەلٸن ٶلتٸرگەنٸ ٷشٸن 15 جىلعا باس بوستاندىعىنان ايىرىلعان باۋىرجان حايرۋلليننٸڭ ٸسٸن قارادى, - دەپ حابارلايدى Tengrinews.kz تٸلشٸسٸ.
بٸرٸنشٸ ساتىداعى سوت ٷكٸمٸنە جەبٸرلەنۋشٸ تاراپ شاعىم تٷسٸرگەن. مارقۇم ايناگٷل حايرۋللينانىڭ اناسىنىڭ ايتۋىنشا, قىزىنىڭ بۇرىنعى كٷيەۋٸ قىلمىستى جوسپارلى تٷردە جاساعان.
"ول قىزىمدى ٶلتٸرەمٸن دەپ بٸرنەشە رەت قورقىتقان. ايناگٷل پوليتسيياعا جٷگٸندٸ, بٸراق حايرۋللينگە ەشقانداي شارا قولدانباعان. ەكٸ بالاسى ٷنەمٸ اناسىن سۇراپ وتىرادى. جازانى جەڭٸلدەتەتٸن جايت رەتٸندە سوت ٷكٸمٸندە ەكٸ كٸشكەنتاي بالاسى بار ەكەنٸ كٶرسەتٸلگەن. بٸراق ول ولاردىڭ اناسىن ٶلتٸرگەن. قىلمىسكەردٸ ٶمٸر بويىنا باس بوستاندىعىنان ايىرۋدى سۇرايمىن. ول تەرروريستەن دە جامان", - دەدٸ كەكيما قاجىپانوۆا سوتتا.
سوتتالۋشىنىڭ ادۆوكاتتارى دا ٷكٸممەن كەلٸسپەيدٸ. ولار كٸسٸ ٶلتٸرۋ اففەكت جاعدايىندا جاسالعانىن ايتىپ, باپتى جازانى جەڭٸلدەتەتٸن باپقا سارالاۋدى سۇرادى.
"مەن قاتتى پسيحيكالىق كٷيزەلٸستە بولدىم. مەن قاتەلەسكەنٸمدٸ بٸلەمٸن. بۇقارالىق اقپارات قۇرالدارى مەنٸ قاتىگەز قىلىپ كٶرەسەتتٸ. بۇرىنعى ەيەلٸمدٸ ٶلتٸرگەنٸمدٸ مويىندايمىن. بٸراق سول سەتتە مەن ەسٸمدٸ بٸلمەدٸم", - دەدٸ باۋىرجان حايرۋللين.
تاراپتاردىڭ ۋەجدەرٸن قاراپ, اپەللياتسييالىق القا ٶز ٷكٸمٸن شىعاردى. حايرۋللينگە قاتىستى ٷكٸم ٶزگەرٸسسٸز قالدىرىلدى. ەكس-شەنەۋنٸك 15 جىلىن قىلمىستىق-اتقارۋ جٷيەسٸنٸڭ بارىنشا قاۋٸپسٸز مەكەمەسٸندە ٶتكٸزەدٸ.
ەسكە سالايىق, 2021 جىلى 19 سەۋٸردە باۋىرجان حايرۋللين بۇرىنعى ەيەلٸ ايناگٷل حايرۋلليناعا 20-دان اسا پىشاق جاراقاتىن سالعان ەدٸ. مارقۇمنىڭ ارتىندا ەكٸ بالاسى قالدى. جەبٸرلەنۋشٸ تاراپ ٷكٸممەن كەلٸسپەي, قاتاڭ جازا بەرۋدٸ سۇرادى.
